Baramati Plane Crash: बारामतीमधून विमान अपघाताची एक मोठी बातमी समोर आली. बुधवारी (13 मे) सकाळी रेडबर्ड कंपनीचे एक ट्रेनर विमान बारामती विमानतळाजवळ असलेल्या गोजुबावी गावाच्या हद्दीत कोसळले. या अपघातामुळे परिसरात एकच खळबळ उडाली असली, तरी सुदैवाने विमानातील शिकाऊ पायलट या घटनेतून सुखरुप बाहेर पडला. विमानाचे 'क्रॅश लँडिंग' होत असताना ते जमिनीवर आदळण्यापूर्वी विजेच्या खांबाला धडकले, ज्यामुळे विमानाचे मोठ्या प्रमाणावर नुकसान झाले.

मिळालेल्या माहितीनुसार, ही घटना बुधवारी सकाळी 8 वाजून 50 मिनिटांच्या सुमारास घडली. रेडबर्ड एअरलाईन्सच्या या विमानाने सरावासाठी उड्डाण केले होते, मात्र हवेत असतानाच विमानात अचानक तांत्रिक बिघाड झाला. तांत्रिक बिघाडामुळे विमानावरचे नियंत्रण सुटू लागल्याने पायलटने ते सुरक्षितरीत्या उतरवण्याचा प्रयत्न केला. प्रत्यक्षदर्शींनी दिलेल्या माहितीनुसार, विमान अत्यंत कमी उंचीवरुन उडत होते, मात्र अचानक खाली येऊ लागले. जमिनीवर कोसळण्यापूर्वी विमानाचा एक भाग शेतातील विजेच्या खांबाला जोरात धडकला आणि त्यानंतर विमान शेतात कोसळले.

अपघाताच्या (Accident) वेळी विमानात केवळ एकच शिकाऊ पायलट होता. विमान जमिनीवर आदळल्यानंतर हा पायलट सुदैवाने कोणत्याही गंभीर दुखापतीशिवाय बाहेर पडला. या घटनेची माहिती मिळताच स्थानिक नागरिकांनी आणि पोलिसांनी तातडीने घटनास्थळाकडे धाव घेतली. पोलिसांनी दिलेल्या प्राथमिक माहितीनुसार, पायलटने प्रसंगावधान राखल्यामुळे मोठा अनर्थ टळला. या घटनेत कोणालाही गंभीर दुखापत झालेली नाही, ही सर्वात मोठी समाधानाची बाब ठरली.

घटनेची माहिती मिळताच बारामती तालुका पोलिसांनी घटनास्थळाचा ताबा घेतला असून पुढील कायदेशीर प्रक्रिया सुरु केली. विमानात नेमका कोणता तांत्रिक बिघाड झाला होता आणि अपघाताची इतर तांत्रिक कारणे काय होती, याचा तपास नागरी विमान वाहतूक महासंचालनालयाकडून केला जाण्याची शक्यता आहे. बारामती परिसरात प्रशिक्षण विमानांचे उड्डाण सातत्याने सुरु असते, मात्र अशा प्रकारच्या अपघातामुळे प्रशिक्षण विमानांच्या सुरक्षिततेचा प्रश्न पुन्हा एकदा चर्चेत आला. पोलीस या प्रकरणाचा अधिक तपास करत आहेत.