एका सोळा वर्षीय अल्पवयीन मुलीवर आठ जणांनी सामूहिक बलात्कार केल्याची धक्कादायक घटना समोर आली आहे. पालघर जिल्ह्यात माहीम परिसरातील पानेरी येथे बंद असलेल्या एका बंगल्यामध्ये ही घटना घडली. सातपाटी सागरी पोलिसांनी आरोपींविरोधात गुन्हा दाखल केला असून, आठही जणांना अटक केली आहे. दरम्यान, या घटनेने पालघर परिसरात खळबळ निर्माण झाली आहे.

मिळालेल्या माहितीनुसार, 16 डिसेंबर रोजी संध्याकाळी पीडित मुलगी बेपत्ता झाली. पीडितेच्या वडिलांनी 17 डिसेंबरला मुलगी बेपत्ता असल्याची तक्रार सातपाटी पोलीस ठाण्यात दिली. मुलीला फोन लावला असता ती फोनवर फक्त रडते अशी माहिती त्यांनी दिली. पोलिसांनी अवघ्या काही तासांत मुलीचा शोध घेतला.

आठ आरोपींपैकी एक जण पीडित मुलीला ओळखत होता, त्याने तिला बोलवले त्याने मुलीला माहीम परिसरातील पानेरी येथे बंद असलेल्या एका बंगल्यामध्ये नेले. याच ठिकाणी त्याच्यासह त्याच्या मित्रांनी या मुलीवर बलात्कार केला. पोलिसांनी आठ आरोपीं विरोधात पोक्सोसह विविध कलम अंतर्गत गुन्हा दाखल केला आहे .