R Ashwin joins Harbhajan Singh and Anil Kumble in a elite List: भारत विरुद्ध वेस्ट इंडिज संघात बुधवारपासून कसोटी मालिकेतील पहिल्या सामन्याला सुरुवात झाली आहे. डॉमिनिकाला होत असलेल्या या सामन्याच्या पहिल्याच दिवशी आर अश्विनने मोठ्या विक्रमाला गवसणी घातली आहे.
या सामन्यात प्रथम गोलंदाजी करणाऱ्या भारतीय संघाकडून पहिल्या डावात आर अश्विनने 2.40 च्या इकोनॉमी रेटने 60 धावा देताना 5 विकेट्स घेतल्या. त्याने वेस्ट इंडिजच्या तेजनारायण चंद्रपॉल, कर्णधार क्रेग ब्रेथवेट, अल्झारी जोसेफ, एलिक अझानाझ आणि जोमेल वॉरिकन यांना बाद केले.
दरम्यान, अल्झारी जोसेफ हा अश्विनची आंतरराष्ट्रीय क्रिकेटमधील 700 वी विकेट ठरला. अश्विनने गोलंदाजी केलेल्या 53 व्या षटकात त्याचा झेल जयदेव उनाडकटने बॅकवर्ड पाँइंटला त्याचा झेल घेतला.
त्यामुळे तो आंतरराष्ट्रीय क्रिकेटमध्ये 700 विकेट्स घेणारा भारताचा अनिल कुंबळे (956 विकेट्स) आणि हरभजन सिंगनंतर (711 विकेट्स) तिसराच भारतीय क्रिकेटपटू ठरला आहे.
याशिवाय अश्विनने त्याच्या कारकिर्दीतील 271 वा आंतरराष्ट्रीय सामना खेळताना 351 डावात 700 विकेट्सचा टप्पा पार केला आहे. त्यामुळे तो सामन्याच्या आणि डावांच्या तुलनेतही सर्वात जलद 700 आंतरराष्ट्रीय विकेट्स घेणार दुसऱ्या क्रमांकाचा गोलंदाज ठरला आहे.
या यादीत अव्वल क्रमांकावर मुथय्या मुरलीधरन आहे. मुरलीधरनने 264 सामन्यांमध्ये आणि 308 डावांमध्ये 700 विकेट्स पूर्ण केल्या होत्या.
अश्विनने स्टेनगन म्हणून ओळखल्या जाणाऱ्या डेल स्टेनलाही सर्वाधिक आंतरराष्ट्रीय विकेट्स घेणाऱ्या गोलंदाजांच्या यादीत मागे टाकले आहे. अश्विन 700 विकेट्स घेणारा जगातील 16 वा खेळाडू ठरला आहे.
त्याने सर्वाधिक आंतरराष्ट्रीय विकेट्स घेणाऱ्या गोलंदाजांच्या यादीत स्टेनला मागे टाकत 16 वा क्रमांक मिळवला आहे. स्टेनने त्याच्या आंतरराष्ट्रीय कारकिर्दीत 265 सामन्यांमध्ये 699 विकेट्स घेतल्या आहेत.
पहिल्या कसोटीच्या पहिल्याच दिवशी वेस्ट इंडिजचा संघ पहिल्या डावात 64.3 षटकात 150 धावांवर सर्वबाद झाला. वेस्ट इंडिजकडून अथानाझने सर्वाधिक 47 धावांची खेळी केली. तसेच कर्णधार क्रेग ब्रेथवेटने 20 धावा केल्या.
या दोघांव्यतिरिक्त वेस्ट इंडिजकडून या डावात कोणालाही 20 धावांचाही टप्पा गाठता आला नाही. भारताकडून अश्विनव्यतिरिक्त रविंद्र जडेजाने 3 विकेट्स घेतल्या. तसेच शार्दुल ठाकूर आणि मोहम्मद सिराज यांनी प्रत्येकी 1 विकेट् घेतली.
तसेच भारताने पहिल्या दिवसाखेर 23 षटकात बिनबाद 80 धावा केल्या आहेत. भारतीय संघ अद्याप 70 धावांनी मागे आहे. भारताचे सलामीवीर रोहित शर्मा पहिल्या दिवशी 65 चेंडूत 30 धावा करून नाबाद आहे. तसेच पदार्पणवीर यशस्वी जयस्वाल 73 चेंडूत 40 धावा करून नाबाद आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.