Virat Kohli Thinks He Is Cristiano Ronaldo Says Yuvraj Singh In A Podcast:

भारताचा माजी अष्टपैलू खेळाडू युवराज सिंग अलीकडच्या काळात आपल्या वक्तव्यांमुळे चर्चेत आहे. माजी कर्णधार महेंद्रसिंग धोनीसोबतच्या मैत्रीबाबत दिलेल्या वक्तव्यानंतर आता त्याने विराट कोहलीबाबत मोठा खुलासा केला आहे.

युवराजने कोहलीची मजा घेत म्हटले की, "तो स्वत:ला ख्रिस्तियानो रोनाल्डो समजतो, पण तो तसा नाही."

युवराज आणि कोहली दोघेही भारतासाठी एकत्र खेळले आहेत. दोघेही आयपीएलमधील रॉयल चॅलेंजर्स बंगलोर (RCB) संघात काही हंगामात एकत्र होते.

युवराजने 2019 मध्ये त्याच्या आंतरराष्ट्रीय क्रिकेट कारकिर्दीला निरोप दिला, तर कोहली सध्या भारतीय संघाचा महत्त्वाचा भाग आहे.

प्रसिद्ध क्रिकेटपटू असण्यासोबतच हे दोघेही चांगले फुटबॉलपटू आहेत आणि युवराज या खेळात तो कोहलीपेक्षा सरस असल्याचे मानतो.

युवराजने एका मुलाखतीत सांगितले की, माझ्या आणि विराटमध्ये फुटबॉलमध्ये मोठी लढत झाली होती. आशिष नेहरा आणि वीरेंद्र सेहवागसोबतही मी फुटबॉलवरुन भांडलो आहे.''

युवराजला कोहली सर्वोत्तम फुटबॉल आहे का, असे विचारले असता तो म्हणाला, ''विराटला असे वाटते. त्याच्याकडे क्षमता आहे, परंतु माझ्याकडे त्याच्यापेक्षा अधिक क्षमता आहे. तो एक महान फलंदाज आहे आणि मी एक चांगला फुटबॉलपटू आहे. विराटला तो ख्रिस्तियानो रोनाल्डो असल्यासारखे वाटतो, पण तो नाही. मात्र, तो क्रिकेटचा ख्रिस्तियानो रोनाल्डो आहे."

याच मुलाखतीत युवराजने कोहलीसोबतचे त्याचे नाते उघड केले. युवराज अशा काही भारतीय खेळाडूंपैकी एक होता ज्याने आपल्या कारकिर्दीच्या सुरुवातीच्या काळात कोहलीला खूप मोकळेपणाने सांभाळून घेतले होते.

दोन्ही खेळाडूंचे एकमेकांशी एकदम घट्ट नाते आहे. अनेकदा ते सोशल मीडियाद्वारे एकमेकांची मजा घेत असतात.

मात्र, युवराजने खुलासा केला की, तो कोहली खूप व्यस्त असल्याने त्याला त्रास देत नाही. “मी त्याला त्रास देत नाही कारण तो सध्या खूप व्यस्त आहे.”