LPG Crisis: क्रिकेटप्रेमींची चिंता वाढवणारी बातमी! आयपीएल 2026 वर गॅस संकटाचं सावट; बीसीसीआय लवकरच घेणार मोठा निर्णय?

IPL 2026 LPG Crisis: पश्चिम आशियात अमेरिका, इस्रायल आणि इराण यांच्यात पेटलेल्या भीषण संघर्षामुळे आता केवळ जागतिक अर्थव्यवस्थाच नव्हे, तर क्रिकेटप्रेमींचा लाडका उत्सव असलेल्या 'इंडियन प्रीमियर लीग' 2026 वरही संकटाचे सावट निर्माण झाले आहे. 28 मार्चपासून बंगळुरु येथे दिमाखात सुरु होणाऱ्या या स्पर्धेला इंधन पुरवठा साखळीतील अडथळे आणि विमान प्रवासातील अडचणींचा मोठा अडसर निर्माण होण्याची शक्यता आहे. विशेषतः एलपीजी (LPG) गॅसच्या तुटवड्यामुळे देशातील मोठ्या शहरांमधील हॉटेल उद्योगावर परिणाम झाला असून याचा थेट फटका आयपीएल दरम्यान खेळाडू आणि प्रेक्षकांच्या व्यवस्थेला बसण्याची चिन्हे आहेत.

चेन्नई आणि बंगळुरु यांसारख्या मेट्रो शहरांमधील हॉटेल असोसिएशनने दिलेल्या माहितीनुसार, सध्या त्यांच्याकडे असलेला गॅसचा साठा अवघा एक ते दोन दिवस पुरेल इतकाच मर्यादित आहे. गॅस पुरवठ्यात अडथळे निर्माण झाल्यामुळे अनेक हॉटेल्सनी आपल्या मेन्यूमध्ये कपात करण्यास सुरुवात केली असून मोजकेच खाद्यपदार्थ बनवले जात आहेत. केंद्र सरकारनेही या परिस्थितीची दखल घेत घरगुती आणि अत्यावश्यक सेवांना गॅस पुरवठ्यात प्राधान्य देण्याचा निर्णय घेतला आहे, ज्यामुळे व्यावसायिक वापरासाठीच्या गॅसवर मर्यादा आल्या आहेत. आयपीएल दरम्यान हजारो क्रिकेट चाहते आणि विदेशी खेळाडू शहरात दाखल होणार असल्याने त्यांच्या खानपानाची व्यवस्था करणे हे फ्रँचायझी आणि हॉटेल व्यवस्थापनासमोर मोठे आव्हान ठरणार आहे.

आयपीएलचे अध्यक्ष अरुण धुमल यांनी या परिस्थितीवर चिंता व्यक्त केली असून बीसीसीआय (BCCI) परिस्थितीवर बारीक लक्ष ठेवून असल्याचे स्पष्ट केले. धुमल यांच्या मते, सध्या परिस्थिती वेगाने बदलत असून सध्यातरी स्पर्धेबाबत अंतिम निर्णय घेणे घाईचे ठरेल, मात्र गरज पडल्यास योग्य तो निर्णय घेतला जाईल. यंदाची आयपीएल स्पर्धा केवळ गॅस तुटवड्यामुळेच नव्हे, तर विधानसभा निवडणुकांच्या वेळापत्रकामुळेही काहीशी आव्हानात्मक ठरत आहे. त्यातच पश्चिम आशियातील तणावामुळे विमान उड्डाणांचे मार्ग बदलले गेले असून रसद आणि साहित्याची वाहतूक करणे अधिक खर्चिक आणि कठीण झाले आहे.

केवळ देशांतर्गतच नव्हे, तर आंतरराष्ट्रीय स्तरावरही या युद्धाचा फटका बसल्याचे दिसून आले आहे. नुकत्याच भारतात झालेल्या टी-20 विश्वचषकानंतर झिम्बाब्वे, वेस्ट इंडीज आणि दक्षिण आफ्रिकेच्या संघांना मायदेशी परतण्यासाठी मोठी कसरत करावी लागली. पश्चिम आशियातील हवाई मार्ग बंद असल्याने अनेक विमानांचे उड्डाण लांबणीवर पडले, ज्यामुळे खेळाडूंना काही काळ भारतातच थांबून राहावे लागले. आयपीएलसाठी जगभरातून खेळाडू भारतात येणार असल्याने त्यांच्या प्रवासाचे नियोजन करणे हे बीसीसीआयसमोर मोठे डोकेदुखीचे काम ठरत आहे.

अशा कठीण परिस्थितीतही अनेक आयपीएल (IPL) फ्रँचायझींनी आपापली सराव शिबिरे सुरु केली आहेत. चेन्नई सुपर किंग्सचे खेळाडू गेल्या काही दिवसांपासून त्यांच्या हाय-परफॉर्मन्स सेंटरमध्ये कसून सराव करत आहेत, तर पंजाब किंग्सचे शिबीर धरमशाला येथे सुरु झाले आहे. 28 मार्चला होणाऱ्या सलामीच्या सामन्यापूर्वी सर्व काही सुरळीत होईल, अशी आशा क्रिकेट चाहत्यांना आहे. मात्र, जर पश्चिम आशियातील तणाव निवळला नाही, तर बीसीसीआयला या वर्षाच्या आयपीएल आयोजनाबाबत काही कडक किंवा पर्यायी निर्णय घ्यावे लागतील, असे संकेत मिळत आहेत.