Team India reached Thiruvananthapuram for 2nd T20I against Australia:

भारत विरुद्ध ऑस्ट्रेलिया संघात सध्या 5 सामन्यांची टी20 मालिका सुरू आहे. या मालिकेतील पहिला सामना 23 नोव्हेंबर रोजी विशाखापट्टणमला पार पडला होता. रोमांचक झालेला हा सामना भारताने 2 विकेट्सने जिंकला होता.

आता या मालिकेतील दुसरा सामना रविवारी (26 नोव्हेंबर) तिरुवनंतपुरममधील ग्रीनफिल्ड आंतरराष्ट्रीय स्टेडियमवर खेळवला जाणार आहे. या सामन्यासाठी भारतीय संघ शुक्रवारी (24 नोव्हेंबर) तिरुवनंतपुरमला पोहचला आहे.

भारतीय संघ तिरुवनंतपुरमला पोहचल्यानंतरचा व्हिडिओ देखील बीसीसीआयने शेअर केला आहे. या व्हिडिओमध्ये दिसते की तिथे पोहचल्यानंतर भारतीय संघाचे जल्लोषात स्वागतही झाले आहे. विमानतळावरही मोठ्या प्रमाणात गर्दी दिसून आली.

या मालिकेत भारतीय संघाचे नेतृत्व सूर्यकुमार यादव करत आहे. वनडे वर्ल्डकपनंतर बीसीसीआयने अनेक वरिष्ठ खेळाडूंना विश्रांती दिली आहे. तसेच हार्दिक पंड्याही दुखापतग्रस्त असल्याने सूर्यकुमारकडे नेतृत्व सोपवण्यात आले आहे. त्याचबरोबर दुसऱ्या सामन्यासाठी ऋतुराज गायकवाड उपकर्णधार असणार आहे.

दरम्यान, या मालिकेतील पहिला सामना जिंकला असल्याने भारतीय संघ 5 सामन्यांच्या मालिकेच 1-0 अशा फरकाने आघाडीवर आहे.

त्यामुळे आता दुसरा सामना जिंकून मालिकेतील आघाडी आणखी भक्कम करण्याची संधी भारताकडे असणार आहे. तसेच मॅथ्यू वेडच्या नेतृत्वातील ऑस्ट्रेलिया संघ दुसरा सामना जिंकून मालिकेत बरोबरी करण्याचा प्रयत्न करेल.

दुसऱ्या सामन्यासाठी भारताच्या प्लेइंग इलेव्हनमध्ये बदल होण्याची शक्यता कमी आहे. मात्र, ऑस्ट्रेलिया संघात बदल होऊ शकतात.

ऑस्ट्रेलियाने पहिल्या सामन्यासाठी काही प्रमुख खेळाडूंना विश्रांती दिली होती. पण आता दुसऱ्या सामन्यात ग्लेन मॅक्सवेल, ऍडम झम्पा, ट्रेविस हेड अशा प्रमुख खेळाडूंचे संघात पुनरागमन होऊ शकते.

असे आहेत दोन्ही संघ -

• भारतीय संघ - सूर्यकुमार यादव (कर्णधार), ऋतुराज गायकवाड (उपकर्णधार), इशान किशन, यशस्वी जयस्वाल, तिलक वर्मा, रिंकू सिंह, जितेश शर्मा (यष्टीरक्षक), वॉशिंग्टन सुंदर, अक्षर पटेल, शिवम दुबे, रवी बिश्नोई, अर्शदीप सिंग, प्रसिद्ध कृष्णा, आवेश खान आणि मुकेश कुमार.

  (श्रेयस अय्यर शेवटच्या दोन सामन्यात उपकर्णधार असेल.)

• ऑस्ट्रेलिया संघ - मॅथ्यू वेड (कर्णधार), ऍरॉन हार्डी, जेसन बेऱ्हेनडॉर्फ, सीन ऍबॉट, टीम डेव्हिड, नॅथन एलिस, ट्रेविस हेडस जोश इंग्लिस, ग्लेन मॅक्सवेल, तन्वीर संघा, मॅथ्यू शॉर्ट, स्टीव्ह स्मिथ, मार्कस स्टॉयनिस, केन रिचर्डसन, ऍडम झम्पा.