Rohit Sharma Revealed why Ravindra Jadeja is not in India's Playing XI for 1st Test match against South Africa:

दक्षिण आफ्रिका विरुद्ध भारत संघात कसोटी मालिकेतील पहिल्या सामन्याला मंगळवारी (२६ डिसेंबर) सुरुवात झाली आहे. सेंच्युरियनला होत असलेला हा सामना बॉक्सिंग डे कसोटी सामना आहे. या सामन्यात दक्षिण आफ्रिकेने नाणेफेक जिंकून प्रथम गोलंदाजी करण्याचा निर्णय घेतला आहे.

या सामन्यातून भारताकडून प्रसिध कृष्णा याचे कसोटी पदार्पण झाले आहे. याबरोबरच आर अश्विनलाही या सामन्यासाठी प्लेइंग इलेव्हनमध्ये संधी मिळाली आहे. दरम्यान, या सामन्यात रविंद्र जडेजाला प्लेइंग इलेव्हनमध्ये संधी न देण्याबद्दल भारताचा कर्णधार रोहित शर्माने नाणेफेकीवेळी खुलासा केला आहे.

खरंतर दक्षिण आफ्रिकेतील वेगवान गोलंदाजांना पोषक असलेले वातावरण पाहाता भारतीय संघ व्यवस्थापन चार वेगवान गोलंदाजांबरोबर एक फिरकी गोलंदाज खेळवेल अशी चर्चा होता, तसेच फिरकी गोलंदाज म्हणून रविंद्र जडेजाला पहिली पसंती दिली जाण्याची शक्यता वर्तवली जात होती.

मात्र, नाणेफेकीवेळी रोहितने सांगितले की जडेजाला सकाळी पाठीमध्ये वेदना आहेत. त्यामुळे त्याला प्लेइंग इलेव्हनमधून बाहेर करण्यात आले असून आर अश्विनला संधी देण्यात आली आहे. रोहितने सांगितले की अश्विन हा संघाकडे असलेला एक दर्जेदार फिरकी गोलंदाज आहे.

दरम्यान, भारताने पहिल्या सामन्यात प्लेइंग इलेव्हनमध्ये अश्विनव्यतिरिक्त शार्दुल ठाकूर, प्रसिध कृष्णा, जसप्रीत बुमराह आणि मोहम्मद शमी या चार वेगवान गोलंदाजांना संधी दिली आहे.

तसेच भारतीय संघात सलामीसाठी यशस्वी जयस्वाल या युवा खेळाडूलाही प्लेइंग इलेव्हनमध्ये संधी मिळाली आहे, तर या सामन्यात केएल राहुल यष्टीरक्षक फलंदाज म्हणून खेळताना दिसणार आहे.

पहिल्या कसोटीसाठी भारताची प्लेइंग इलेव्हन -

रोहित शर्मा (कर्णधार), यशस्वी जयस्वाल, शुभमन गिल, विराट कोहली, श्रेयस अय्यर, केएल राहुल (यष्टीरक्षक), आर अश्विन, शार्दुल ठाकूर, जसप्रीत बुमराह, मोहम्मद सिराज, प्रसिध कृष्णा.