Rohit Sharma Prasidh Krishna Unique ODI Record: भारत आणि अफगाणिस्तान यांच्यातील वनडे मालिकेतील तिसरा सामना चेन्नईच्या एम. ए. चिदंबरम स्टेडियमवर खेळला जात आहे. या सामन्यात टॉस हारल्यानंतर पहिल्यांदा गोलंदाजी करण्यासाठी मैदानात उतरलेल्या भारतीय संघासाठी रोहित शर्मा आणि वेगवान गोलंदाज प्रसिद्ध कृष्णा या जोडीने मैदानावर अक्षरशः धुमाकूळ घातला. या दोघांनी मिळून आंतरराष्ट्रीय वनडे क्रिकेटमध्ये एका अत्यंत दुर्मिळ आणि अनोख्या विक्रमाची नोंद केली, जो भारतीय वनडे क्रिकेटच्या इतिहासात यापूर्वी कधीही घडला नव्हता.

या सामन्यात अफगाणिस्तानचा कर्णधार हशमतुल्लाह शाहिदीने नाणेफेक जिंकून पहिल्यांदा फलंदाजी करण्याचा निर्णय घेतला खरा, पण प्रसिद्ध कृष्णाच्या आग ओकणाऱ्या गोलंदाजीने आणि स्लिपमध्ये उभ्या असलेल्या रोहित शर्माच्या 'सुपरमॅन' क्षेत्ररक्षणाने अफगाण संघाच्या टॉप ऑर्डरचा पूर्णपणे धुव्वा उडवला.

भारतीय संघाने (Team India) आपल्या संपूर्ण वनडे क्रिकेटच्या इतिहासात आतापर्यंत 1078 सामने खेळले, परंतु आजच्या सामन्यापूर्वी एकाच गोलंदाजाने घेतलेले डावातील पहिले तिन्ही विकेट्स एकाच क्षेत्ररक्षकाने झेलबाद करण्याची किमया कधीही घडली नव्हती. सामन्याच्या सुरुवातीपासूनच प्रसिद्ध कृष्णा अत्यंत अचूक आणि शिस्तबद्ध टप्प्यावर गोलंदाजी करत होता. त्याला रोहित शर्माची स्लिपमध्ये अप्रतिम साथ लाभली. कृष्णाने अफगाण संघाचे पहिले तिन्ही फलंदाज बाद केले आणि विशेष म्हणजे ज्या तीन चेंडूंवर कृष्णाला हे विकेट्स मिळाले, ते तिन्ही झेल फर्स्ट स्लिपमध्ये रोहित शर्माने टिपले.

या ऐतिहासिक विक्रमाची सुरुवात डावाच्या सुरुवातीलाच झाली, जेव्हा प्रसिद्ध कृष्णाने फॉर्मात असलेल्या रहमानुल्लाह गुरबाजला एका अप्रतिम चेंडूवर चकवले. रोहित शर्माने अतिशय वेगाने एक उत्कृष्ट झेल टिपला. गुरबाज अवघ्या 5 धावा करुन बाद झाला. यानंतर सहाव्या षटकात प्रसिद्ध कृष्णाने पुन्हा एकदा आपली जादू दाखवत रहमत शाहला बॅक-ऑफ-द-लेंथ चेंडूवर फसवले.

रहमतने चेंडू लेग साईडला मारण्याचा प्रयत्न केला, पण चेंडू बॅटच्या वरच्या कडेला लागून थेट रोहित शर्माच्या हातात विसावला. रहमत शाह देखील 5 धावा करुन माघारी परतला. या जोडीचा खरा थरार आठव्या षटकात पाहायला मिळाला, जेव्हा रोहित आणि प्रसिद्ध कृष्णाने 'हॅट्ट्रिक' पूर्ण केली. इब्राहिम जादरानने शरीरापासून दूर असलेला चेंडू ड्राईव्ह करण्याचा प्रयत्न केला, पण चेंडू स्लिपमध्ये गेला आणि रोहित शर्माने डावातील आपला तिसरा झेल घेत जादरानला पॅव्हेलियनचा रस्ता दाखवला.

भारतासाठी (India) वनडे क्रिकेटमध्ये एकाच गोलंदाजाच्या चेंडूवर क्षेत्ररक्षकाने तीन झेल घेण्याची किमया यापूर्वीही घडली, परंतु ते डावातील पहिले सलग तीन विकेट्स नव्हते. यापूर्वी 2004 मध्ये पर्थ येथे झिम्बाब्वेविरुद्ध व्ही. व्ही. एस. लक्ष्मणने इरफान पठाणच्या गोलंदाजीवर तीन झेल घेतले होते. त्यानंतर 2018 मध्ये दुबईत बांगलादेशविरुद्ध शिखर धवनने जसप्रीत बुमराहच्या गोलंदाजीवर अशीच कामगिरी केली होती. आता 2026 मध्ये चेन्नईच्या मैदानात रोहित शर्मा आणि प्रसिद्ध कृष्णा या जोडीने अफगाणिस्तानविरुद्ध या ऐतिहासिक आणि अनोख्या विक्रमाची नोंद करत भारताच्या क्रिकेट इतिहासात आपले नाव सुवर्णअक्षरांनी कोरले.