IND vs AFG ODI: टीम इंडियाला मोठा धक्का! हॅमस्ट्रिंगच्या दुखापतीमुळे विराट कोहली अफगाणिस्तान विरुद्धच्या वनडे मालिकेतून बाहेर

भारतीय क्रिकेट चाहत्यांसाठी आणि टीम इंडियासाठी अत्यंत निराशाजनक बातमी समोर आली आहे. भारताचा दिग्गज फलंदाज विराट कोहली 'हॅमस्ट्रिंग'च्या समस्येमुळे अफगाणिस्तानविरुद्धच्या आगामी एकदिवसीय (ODI) मालिकेला मुकणार आहे.

पीटीआय (PTI) ने दिलेल्या वृत्तानुसार, विराटची ही दुखापत भारतीय संघासाठी मोठा चिंतेचा विषय ठरली आहे. २०२७ मध्ये होणाऱ्या एकदिवसीय विश्वचषकाच्या (ODI World Cup 2027) पूर्वतयारीच्या दृष्टीने ही मालिका अत्यंत महत्त्वाची मानली जात असतानाच भारताला हा मोठा झटका बसला आहे.

३७ वर्षांचा असूनही आपल्या उत्कृष्ट फिटनेससाठी ओळखला जाणारा विराट सध्या त्याच्या कारकिर्दीतील सर्वोत्तम फॉर्ममध्ये आहे. आयपीएल २०२६ चा यशस्वी हंगाम संपल्यानंतर विराट या मालिकेच्या माध्यमातून आंतरराष्ट्रीय क्रिकेटमध्ये पुनरागमन करणार होता. मात्र, या दुखापतीमुळे त्याच्या आणि भारतीय संघाच्या योजनांना ब्रेक लागला असून, त्याचे संघात न असणे हा टीम इंडियासाठी मोठा तोटा मानला जात आहे.

आयपीएलच्या अंतिम सामन्यात ऐतिहासिक कामगिरी

नुकत्याच पार पडलेल्या आयपीएल २०२६ च्या हाय-व्होल्टेज अंतिम सामन्यात विराटने आपल्या बॅटची जादू दाखवली होती. अहमदाबादच्या नरेंद्र मोदी स्टेडियमवर गुजरात टायटन्सविरुद्ध खेळताना त्याने मॅच-विनिंग अर्धशतकी खेळी साकारली होती.

त्याच्या याच शानदार खेळीच्या जोरावर रॉयल चॅलेंजर्स बेंगळुरू (RCB) संघाने सलग दुसऱ्यांदा आयपीएलच्या ट्रॉफीवर आपले नाव कोरले. विराटने या संपूर्ण हंगामात आरसीबीसाठी सर्वाधिक, तर स्पर्धेत चौथ्या क्रमांकाच्या सर्वाधिक ६७५ धावा कुटल्या होत्या. १६ डावांमध्ये ५६.२५ ची सरासरी आणि १६५.८४ चा स्ट्राईक रेट राखत त्याने आपले वर्चस्व सिद्ध केले होते.

बीसीसीआय सूत्रांनी दिली दुखापतीची माहिती

विराट कोहलीच्या दुखापतीची गांभीर्यता स्पष्ट करताना भारतीय क्रिकेट नियामक मंडळाच्या (BCCI) एका सूत्राने सांगितले की, "हॅमस्ट्रिंगच्या दुखापतीमुळे विराट अफगाणिस्तानविरुद्धच्या वनडे मालिकेचा भाग असणार नाही." भारत आणि अफगाणिस्तान यांच्यातील तीन सामन्यांच्या या एकदिवसीय मालिकेला १३ जूनपासून धरमशाला येथील नयनरम्य मैदानावर सुरुवात होत आहे. मात्र, विराट कोहलीसारखा महान खेळाडू मैदानात नसणार असल्याने या मालिकेची उत्सुकता काहीशी कमी होणार असल्याचे दिसत आहे.