Goa: गोवा प्रोफेशनल लीग फुटबॉल विजेतेपदासाठी सर्व बाराही संघ इच्छुक आहेत, पण खरी चुरस चार प्रमुख संघांतच असेल. गतविजेता स्पोर्टिंग क्लब द गोवासह साळगावकर एफसी, धेंपो स्पोर्टस क्लब, चर्चिल ब्रदर्स संघ जेतेपदासाठी दावेदार असतील.

गोवा प्रो-लीग स्पर्धेच्या 2021-22 (Goa Pro League Tournament) मोसमाला शनिवारपासून सुरवात होत आहे. स्पर्धेतील पहिला सामना स्पोर्टिंग क्लब द गोवा आणि पणजी फुटबॉलर्स यांच्यात म्हापसा येथील धुळेर स्टेडियमवर खेळला जाईल. कोविड-19 मार्गदर्शक शिष्टाचारासह चाहत्यांना स्टेडियमवर प्रवेश देण्याचा निर्णय गोवा फुटबॉल असोसिएशनने घेतला आहे.

स्पोर्टिंग क्लबने गतमोसमात एकही सामना न गमावता 11 लढतीतून 23 गुण प्राप्त करत सलग दुसऱ्यांदा विजेतेपद मिळविले होते. कोरोना विषाणू महामारीच्या पहिल्या लाटेमुळे 2019-20 मोसम प्रभावित झाला होता. तेव्हा स्पर्धा अर्धवट राहिली होती, त्यानंतर स्पोर्टिंग व चर्चिल ब्रदर्सला संयुक्त विजेते घोषित करण्यात आले होते.

गतमोसमात धेंपो स्पोर्टस क्लबने 21 गुणांसह उपविजेतेपद मिळविले होते. कळंगुट असोसिएशनने चमक दाखविताना 20 गुणांसह तिसरा क्रमांक मिळविला. साळगावकर (20 गुण), वास्को क्लब (16), एफसी गोवा (16 गुण) या संघांना अनुक्रमे चौथा ते सहावा क्रमांक मिळाला होता. चर्चिल ब्रदर्स (15), यूथ क्लब मनोरा (14), पणजी फुटबॉलर्स (13), गार्डियन एंजल स्पोर्टस क्लब (10) अनुक्रमे सातवा ते दहावा क्रमांक मिळाला. वेळसाव स्पोर्टस अँड कल्चरल क्लबने आठ गुणांसह तळाचे स्थान टाळले, तर पाच गुणांसह सेझा फुटबॉल अकादमी संघ पाच गुणांसह तळात राहिला. मात्र कोविड-19 उद्‍भवलेल्या परिस्थितीमुळे जीएफएने सेझा अकादमीची पदावनती रद्द केली, त्यामुळे 2021-22 मोसमासाठी त्यांचे स्थान कायम राहिले.