पणजी: गोवा फुटबॉल असोसिएशनच्या महिला फुटबॉल लीगमध्ये शुक्रवारी युनायटेड क्लब तळावलीने सलग दुसऱ्या विजयाची नोंद केली. नावेली येथील रोझरी मैदानावर त्यांनी एफसी वायएफए संघावर 4-0 फरकाने मात केली.
जोरदार पावसामुळे म्हापसा येथील धुळेर स्टेडियमच्या मैदानावर पाणी साचल्यामुळे एफसी गोवा आणि गतविजेते शिरवडे स्पोर्टस क्लब यांच्यातील सामना अर्धवट राहिला. तासाभराच्या खेळानंतर सामना स्थगित झाला तेव्हा दोन्ही संघ गोलशून्य बरोबरीत होते. सामन्यातील उर्वरित वेळेतील खेळाबाबत गोवा फुटबॉल असोसिएशन निर्णय घेणार आहे.
तळावली संघाने मागील लढतीत कॉम्पॅशन FC चा आठ गोलने धुव्वा उडविला होता. FC YFA वरील विजयासह तळावली संघाचे आता तीन लढतीतून सहा गुण झाले असून त्यांनी अव्वल स्थानावरील एफसी गोवास गाठले आहे. वायएफए संघाचा हा स्पर्धेतील पहिलाच सामना होता.
मागील लढतीत पाच गोल केलेल्या कॅरेन एस्ट्रोसियो हिने दोन गोल केले. याशिवाय रिझेला आल्मेदा व स्टेसी कार्दोझ यांनी प्रत्येकी एक गोल नोंदविला. सामन्याच्या दुसऱ्याच मिनिटास वायएफए संघाची गोलरक्षक ॲनेट दा कॉस्ता व बचावपटू यांच्यातील गोंधळाचा लाभ उठवत कॅरेनने तळावली संघाने गोलखाते उघडले.
21 व्या मिनिटास जोसेल मस्कारेन्हास हिचा क्रॉस फटका अडविण्यास गोलरक्षक ॲनेटला अपयश आले, त्याचा लाभ उठवत कॅरेनने संघाची आघाडी भक्कम केली. सामन्याच्या 41 व्या मिनिटास रिझेला हिने तळावली संघची स्थिती 3-0अशी मजबूत केली. 82 व्या मिनिटास स्टेसीने संघाच्या विजयावर शिक्कामोर्तब करणारा गोल केला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
