Pranavi Urs Gold Medal Asian Games 2026: एशियन गेम्स 2026च्या चौदाव्या दिवशी भारतीय खेळाडूंनी पुन्हा एकदा ऐतिहासिक कामगिरी करत देशाची मान अभिमानाने उंचावली. गोल्फमध्ये भारताची प्रतिभावान खेळाडू प्रणवी उर्स हिने सुवर्णपदक जिंकत इतिहास रचला. विशेष म्हणजे, एशियन गेम्सच्या इतिहासात वैयक्तिक गोल्फ स्पर्धांमध्ये गोल्ड मेडल जिंकणारी ती भारताची पहिलीच महिला गोल्फर ठरली. तिच्या या ऐतिहासिक विजयामुळे तब्बल 24 वर्षांनंतर भारताचे गोल्फमधील सुवर्णपदकाचे प्रतीक्षा संपली असून क्रीडाप्रेमींमध्ये आनंदाचे वातावरण आहे. याआधी 2002 मध्ये झालेल्या एशियन गेम्समध्ये भारताच्या शिव कपूरने गोल्फमध्ये सुवर्णपदक पटकावले होते, त्यानंतर आता प्रणवीने ही कामगिरी करुन दाखवली.

अंतिम फेरीपूर्वी प्रणवीने 15-अंडर 195 च्या उत्कृष्ट स्कोरसह तीन शॉट्सची मजबूत आघाडी घेतली. फायनल राउंडमध्ये तिने आपल्या प्रतिस्पर्ध्यांना अजिबात संधी दिली नाही. तिसऱ्या होलमध्ये खराब ट्रिपल बोगीमुळे तिची तीन शॉट्सची आघाडी काहीशी धोक्यात आली, तरीही ती खचली नाही. तिने या धक्क्यातून दमदार पुनरागमन करत सलग तीन बर्डी झळकावल्या आणि सामन्यावर पुन्हा पकड मजबूत केली. संपूर्ण चार दिवसांच्या खेळात इव्हन-पार 70च्या स्कोरसह तिने एकूण 5-अंडर 265 ची कामगिरी नोंदवली आणि इतर खेळाडूंपेक्षा एका स्ट्रोकची निर्णायक आघाडी राखून सुवर्णपदकावर आपले नाव कोरले.

केवळ वैयक्तिकच नव्हे, तर सांघिक स्पर्धेतही तिने उत्कृष्ट खेळ दाखवला. भारताच्या (India) इतर प्रतिभावान खेळाडूंनीही यात मोलाची साथ दिली; अंतिम फेरीत अदिती अशोकने 67 आणि दीक्षा डागरने 77चा स्कोर केला. या तिघींच्या संयुक्त कामगिरीच्या जोरावर भारताने टीम इव्हेंटमध्ये भारतासाठी रौप्य पदक देखील जिंकले. या स्पर्धेत चीनने 22-अंडर 538 स्कोर करत सुवर्णपदक मिळवले, तर भारताने 14-अंडर 546 स्कोरसह दुसरे स्थान पटकावले.

अवघ्या 23व्या वर्षी प्रणवीने गोल्फ विश्वात आपले एक वेगळे स्थान निर्माण केले. तिने यापूर्वी 2010च्या दशकात थाईिशंघा वर्ल्ड जूनियर चॅम्पियनशिप आणि ऑल इंडिया जूनियर गर्ल्स चॅम्पियनशिपमध्ये आपल्या खेळाची चुणूक दाखवली होती. 2023च्या एशियन गेम्समध्ये ती अगदी थोड्यासाठी पदकापासून दूर राहिली होती, मात्र तिने हार मानली नाही. 2024 मध्ये अंडालूसिया कोस्टा डेल सोल ओपन डी एस्पानामध्ये तिसरे स्थान मिळवून तिने आंतरराष्ट्रीय स्तरावर सर्वांचे लक्ष वेधले.

2025 मध्ये IGPL इनविटेशनल मुंबई स्पर्धा जिंकणे ही तिच्या कारकिर्दीतील मोठी मजल ठरली. तिच्या या उल्लेखनीय आणि प्रेरणादायी कामगिरीची दखल घेत तिला 2023 मध्ये 'अर्जुन पुरस्कारा'ने सन्मानित करण्यात आले होते. प्रणवीच्या या सुवर्णयशाने भारताच्या युवा खेळाडूंसाठी यशाचे नवे द्वार उघडले.