PAK vs NZ: पाकिस्तान क्रिकेट बोर्डाने या महिन्यात कराची येथे सुरु होणाऱ्या न्यूझीलंडविरुद्धच्या तीन सामन्यांच्या वनडे मालिकेसाठी 16 सदस्यीय संघाची घोषणा केली आहे. शाहिद आफ्रिदीच्या अध्यक्षतेखालील पाकिस्तानच्या अंतरिम निवड समितीने या संघाची निवड केली आहे. काही नवीन आणि जुन्या खेळाडूंना या संघात स्थान देण्यात आले आहे. दुसरीकडे, या मालिकेसाठी संघाची घोषणा करण्यापूर्वी निवड समितीने संघ व्यवस्थापनाशी सल्लामसलत केल्याचे आफ्रिदीने सांगितले आहे. कराचीमध्ये 9 ते 13 जानेवारी दरम्यान तीन सामन्यांची वनडे मालिका खेळवली जाणार आहे.

दरम्यान, पाकिस्तानच्या अंतरिम निवड समितीने एकदिवसीय मालिकेसाठी 16 सदस्यीय संघाची घोषणा केली, ज्यात दुखापतीतून सावरल्यानंतर सलामीवीर फखर जमानचा समावेश करण्यात आला आहे. तर हरिस सोहेललाही मर्यादित षटकांच्या मालिकेसाठी परत बोलावण्यात आले आहे. हरिसने ऑक्टोबर 2020 मध्ये पाकिस्तानसाठी (Pakistan) शेवटचा एकदिवसीय सामना खेळला होता.

तसेच, देशांतर्गत स्पर्धांमध्ये उत्कृष्ट कामगिरी करणाऱ्या अनकॅप्ड तय्यब ताहिरचा प्रथमच संघात समावेश करण्यात आला आहे. तर शादाब खानच्या जागी उसामा मीरची निवड करण्यात आली आहे.

दुसरीकडे, कराचीत संघाची घोषणा करताना शाहिद आफ्रिदी म्हणाला की, “मी सकाळी शादाबशी बोललो. बोटाला झालेल्या दुखापतीमुळे त्याला बरे वाटत नाही. यामुळे न्यूझीलंडविरुद्धच्या (New Zealand) आगामी मालिकेसाठी त्याची निवड झालेली नाही.''

पाकिस्तान संघ: बाबर आझम (कर्णधार), फखर जमान, हरिस रौफ, हरिस सोहेल, इमाम-उल-हक, कामरान गुलाम, मोहम्मद हसनैन, मोहम्मद नवाज, मोहम्मद रिझवान (विकेटकीपर), मोहम्मद वसीम जूनियर, नसीम शाह, सलमान अली आगा , शाहनवाज डहानी, शान मसूद, तय्यब ताहिर आणि उसामा मीर.