Shreyas Iyer Health Updates: भारत विरुद्ध ऑस्ट्रेलिया संघात सोमवारी अहमदाबादला झालेला कसोटी मालिकेतील चौथा सामना अनिर्णित राहिला. त्यामुळे ही चार सामन्यांची ही कसोटी मालिकात 2-1 अशा फरकाने जिंकली. मात्र, या सामन्यादरम्यान, भारताला श्रेयस अय्यरच्या पाठदुखीने डोके वर काढल्याने मोठा धक्का बसला होता.

हा सामना सुरू असताना तिसऱ्या दिवसाच्या खेळानंतर श्रेयस अय्यरने पाठीच्या दुखापतीची तक्रार केली होती. त्यामुळे त्याला या सामन्यात फलंदाजी करायला येता आले नाही. त्याने फलंदाजी न केल्याने भारताचा पहिला डाव 9 बाद 571 धावांवर संपला होता.

दरम्यान, हा सामना संपल्यानंतर भारताचा कर्णधार रोहित शर्माने श्रेयसच्या तंदुरुस्तीबद्दल महत्त्वाचे अपडेट्स दिले आहेत.

रोहित म्हणाला, 'बिचारा, ही खूप दुर्दैवी घटना होती. तो पूर्ण दिवस फलंदाजीसाठी प्रतिक्षा केली आणि दिवसाचा खेळ संपत असताना त्याला पाठदुखीचा त्रास सुरू झाला. त्याला स्कॅनसाठी पाठवण्यात आले. त्याच्या स्कॅनच्या रिपोर्ट्सबाबत मला फार काही माहित नाही. पण तो सध्या ठिक वाटत नाहीये.'

'नक्कीच त्याचमुळे तो इथे नव्हता. आता त्याला कितीवेळ या दुखापतीतून सावरायला लागेल आणि तो कधी पुनरागमन करू शकतो आम्हाला सध्या माहित नाही. जेव्हा ही दुखापत झाली, तेव्हा ती वरवरची दिसत नव्हती. मला आशा आहे की तो लवकर बरा होईल आणि परत येऊन चांगला खेळ करेल.

खरंतर श्रेयसने यापूर्वीही पाठदुखीचा सामना केला आहे. याचवर्षी जानेवारी महिन्यात श्रीलंकेविरुद्ध वनडे मालिकेत खेळताना त्याला पाठीची दुखापत झाली होती. त्यानंतर तो न्यूझीलंडविरुद्धच्या मर्यादीत षटकांच्या मालिकेला मुकला होता. तसेच याच दुखापतीमुळे तो ऑस्ट्रेलियाविरुद्ध नागपूरला झालेल्या पहिल्या कसोटी सामन्यातही खेळला नव्हता.

पण त्याने दिल्ली झालेल्या ऑस्ट्रेलियाविरुद्धच्या दुसऱ्या कसोटीतून भारतीय संघात पुनरागमन केले होते. मात्र पुनरागमनानंतर त्याला फारशी चांगली कामगिरी करता आली नव्हती. त्याने ऑस्ट्रेलियाविरुद्ध नुकत्यात झालेल्या कसोटी मालिकेत दुसऱ्या आणि तिसऱ्या कसोटीत मिळून केवळ 32 धावा केल्या.

भारताबरोबरच केकेआरलाही धक्का बसण्याची शक्यता

दरम्यान, आता श्रेयसला पुन्हा पाठीची दुखापत झाली असल्याने तो 17 मार्चपासून ऑस्ट्रेलियाविरुद्ध सुरु होणाऱ्या तीन सामन्यांच्या वनडे मालिकेत खेळण्याची शक्यता कमी आहे.

तसेच आगामी आयपीएल हंगामामध्येही तो खेळू शकेल की नाही, यावर प्रश्नचिन्ह कायम आहे. श्रेयस कोलकाता नाईट रायडर्सचा कर्णधार आहे. त्यामुळे तो जर आयपीएल 2023 हंगामात खेळला नाही, तर त्यांनाही मोठा धक्का बसू शकतो.