Jemimah Rodrigues Dance on Chikni Chameli: भारतात सध्या वूमन्स प्रीमियर लीग 2023 स्पर्धा खेळवली जात आहे. या स्पर्धेत विविध देशातील खेळाडू एकत्र येऊन मैदानात शानदार कामगिरी करण्याबरोबरच रिकाम्या वेळेत मजामस्ती करतानाही दिसत आहेत. नुकतेच दिल्ली कॅपिटल्सच्या संघातील खेळाडूंच्या मस्तीचे व्हिडिओ समोर आले आहेत.

दिल्ली कॅपिटल्सची युवा फलंदाज जेमिमाह रोड्रिग्जने तिच्या सोशल मीडिया अकाउंट्सवर काही व्हिडिओ शेअर केले आहेत. यामध्ये तिच्यासह दिल्ली कॅपिटल्स संघातील तिच्या संघसहकारी गाणी म्हणताना आणि डान्स करतानाही दिसत आहेत.

यातील एका व्हिडिओमध्ये जेमिमाह संघसहकाऱ्यांसह 'चिकनी चमेली', या बॉलिवूड गाण्यावरही डान्स करताना दिसत आहे. तिने शेअर केलेल्या या व्हिडिओंवर चाहत्यांकडून विविध प्रतिक्रिया आल्या असून हे व्हिडिओ चाहत्यांच्या पसंतीस देखील उतरत आहेत.

रोड्रिग्जने हे व्हिडिओ शेअर करताना कॅप्शन लिहिले आहे की 'दिल्ली कॅपिटल्सच्या कुटुंबासह थोडे कराओके आणि डान्सिंग.'

दरम्यान, जेमिमाहच्या कामगिरीबद्दल बोलायचे झाल्यास तिने आत्तापर्यंत दिल्लीकडून चांगली कामगिरी केली आहे. तिने 5 सामन्यांतील 4 डावात 56.50 च्या सरासरीने 113 धावा केल्या आहेत.

तसेच दिल्ली कॅपिटल्सनेही आत्तापर्यंत दमदार कामगिरी केली असून संघाची कर्णधार मेग लेनिंग सध्या या हंगामात सर्वाधिक धावा करणारी खेळाडू देखील आहे. तिने 5 सामन्यांमध्ये 55.25 च्या सरासरीने 2 अर्धशतकांसह 221 धावा केल्या आहेत.

तसेच दिल्ली कॅपिटल्स संघही प्लेऑफमध्ये पोहोचण्याच्या उंबरठ्यावर आहे. दिल्लीने आत्तापर्यंत 5 सामन्यांमध्ये चार विजय मिळवले आहेत आणि एक पराभव स्विकारला आहे. त्यांनी अजून एक विजय मिळवल्यास हे प्लेऑफमध्ये प्रवेश करतील.

जेमिमाह एंटरटेनमेंट पॅकेज

जेमिमाहने चाहत्यांचे मनोरंजन करणे तसे नवीन नाही. ती यापूर्वी अनेकदा तिच्या वेगवेगळ्या व्हिडिओमधून चाहत्यांचे मनोरंजन करत असते. अनेकदा तिचे गिटार वाजवतानाचे, गाणे म्हणतानाचे किंवा डान्स करतानाचेही व्हिडिओ व्हायरल झाले आहेत. तसेच अनेकदा ती संघसहकाऱ्यांबरोबर मस्ती करतानाही दिसली आहे.