IPL 2026 Schedule: क्रिकेट प्रेमींसाठी एक महत्त्वाची आणि मोठी बातमी समोर आली. इंडियन प्रीमियर लीग 2026 च्या हंगामाच्या सुरुवातीच्या तारखेमध्ये बीसीसीआयने बदल केला असून आता हा भव्य सोहळा 28 मार्च 2026 पासून सुरु होणार आहे. यापूर्वी हा प्रतिष्ठित टूर्नामेंट 26 मार्चपासून सुरु होणार असल्याचे संकेत होते, मात्र देशातील पाच राज्यांच्या विधानसभा निवडणुकांचे वेळापत्रक लक्षात घेता आयोजकांनी दोन दिवसांचा उशीर करण्याचा निर्णय घेतला. तामिळनाडू, केरळ, आसाम, पश्चिम बंगाल आणि पुद्दुचेरी या राज्यांमध्ये निवडणुका होणार असल्याने सुरक्षेच्या कारणास्तव आणि नियोजनाच्या दृष्टीने हा बदल करण्यात आला.

आयपीएलच्या (IPL) संपूर्ण वेळापत्रकाच्या घोषणेला उशीर होत असल्यामुळे चाहत्यांमध्ये चिंतेचे वातावरण होते, मात्र त्यामागील मुख्य कारण आता स्पष्ट झाले. ज्या पाच राज्यांमध्ये निवडणुका होणार आहेत, त्यापैकी पश्चिम बंगाल, तामिळनाडू आणि आसाम या तीन राज्यांमध्ये आयपीएलचे महत्त्वाचे सामने खेळवले जाणार आहेत. कोलकाता येथील ऐतिहासिक ईडन गार्डन्स हे कोलकाता नाईट रायडर्सचे (KKR) होम ग्राऊंड आहे, तर चेन्नईतील एम. ए. चिदंबरम स्टेडियम हे चेन्नई सुपर किंग्सचे (CSK) बालेकिल्ला मानले जाते. याशिवाय, गुवाहाटी हे राजस्थान रॉयल्सचे दुसरे महत्त्वाचे वेन्यू आहे. या राज्यांच्या विधानसभा निवडणुकांच्या तारखा अद्याप जाहीर न झाल्यामुळे बीसीसीआयला संपूर्ण वेळापत्रक निश्चित करण्यात अडचणी येत आहेत.

प्रसारणकर्त्यांनी (Broadcasters) आगामी स्पर्धेच्या सुरुवातीची तारीख जाहीर केली असली तरी, संपूर्ण 74 सामन्यांचे वेळापत्रक अद्याप गुलदस्त्यात आहे. निवडणूक आयोगाकडून तारखांची घोषणा होताच, आयपीएलचे वेळापत्रकही जाहीर केले जाईल, असे सूत्रांकडून समजते. विशेषतः ज्या दिवशी मतदान असेल, त्या दिवशी त्या शहरात सामने टाळण्याचा प्रयत्न बीसीसीआय (BCCI) करणार आहे. खेळाडूंची सुरक्षा आणि प्रेक्षकांची गर्दी हाताळण्यासाठी पोलिसांवरील ताण कमी करणे हा यामागील प्रमुख उद्देश आहे. निवडणुकांमुळे आयपीएलमध्ये अशा प्रकारचे बदल होण्याची ही पहिलीच वेळ नाही, यापूर्वीही अनेकदा निवडणुकांच्या तारखांनुसार आयपीएलचे वेळापत्रक बदलण्यात आले आहे.

येत्या काही दिवसांत निवडणूक आयोगाकडून पाच राज्यांच्या निवडणुकांचा कार्यक्रम स्पष्ट होईल आणि त्यानंतर तत्काळ बीसीसीआय अधिकृतपणे आयपीएल 2026 चे संपूर्ण वेळापत्रक प्रसिद्ध करेल. यंदाच्या हंगामात अनेक नवीन बदल पाहायला मिळणार असून, सुरुवातीची तारीख बदलल्यामुळे आता 28 मार्च रोजी होणाऱ्या पहिल्या सामन्याकडे सर्वांचे लक्ष लागले आहे. गतविजेता संघ आणि उपविजेता संघ यांच्यातच सलामीचा सामना रंगण्याची परंपरा यंदाही कायम राहण्याची शक्यता आहे.