बंगळूर: सूर्यकुमार यादवच्या संघाने टी-२० विश्वकरंडक जिंकल्यानंतर प्रतीक्षा असलेल्या आयपीएल स्पर्धेचा धुमधडाका सुरू होत आहे. १० संघ, १३ ठिकाण, ७० साखळी सामने अशी मेजवानी आणि प्रत्येक सामन्यात रोमांचकारी थरार प्रेक्षकांना मिळणार आहे. गतविजेत्ये रॉयल चॅलेंजर्स बंगळूर आणि सनरायझर्स हैदराबाद यांच्यातील सामन्याने आयपीएलच्या १९व्या मोसमाचा पडदा वर जाणार आहे.

जवळपास दोन महिने चौकार-षटकारांची बरसात पाहायला मिळणार आहे. २४ मेपर्यंत साखळी सामने होणार असून त्यानंतर प्लेऑफच्या लढती होतीत तोपर्यंत ७० सामने होणार आहेत.

टी-२० विश्वकरंडक स्पर्धा गाजवणारे संजू सॅमसन, ईशान किशन ते जसप्रीत बुमरापर्यंत सर्व खेळाडू एकमेकांविरुद्ध लढतील. अर्थात एकाबाजूला या विश्वविजेत्यांच्या कामगिरीची उत्सुकता असेल, त्याच वेळी विराट कोहली आणि रोहित शर्मा यांच्यासह ४४ वर्षीय महेंद्रसिंग धोनीच्याही कामगिरीकडे सर्वांचे लक्ष असणार आहे.

काही मोसम अगोदर जेवढे संघ तेवढीच ठिकाण असायची; परंतु आयपीएलचा थरार ज्या राज्यांचे संघ नाहीत त्यांनाही अनुभवण्यासाठी ठिकाणे वाढवण्यात आली, त्यामुळे १० संघ असले तरी १३ ठिकाणी सामने होणार आहेत.

गत स्पर्धा संपल्यानंतर दुसऱ्या दिवशी चिन्नास्वामी स्टेडियमवर झालेल्या जल्लोषाच्या कार्यक्रमातील चेंगराचेंगरीत ११ जणांचे जीव गेले होते. त्यानंतर चिन्नास्वामी स्टेडियमवर देशांतर्गतही स्पर्धांचे सामने झाले नव्हते.

आता आयपीएलच्या निमित्ताने पुन्हा एकदा क्रिकेट या स्टेडियमवर परतणार आहे. चेंगराचेंगरीचे प्रकार पुन्हा घडू नयेत, यासाठी अत्याधुनिक सुरक्षा व्यवस्था करण्यासाठी तब्बल सात कोटी खर्च करण्यात आले आहेत.

जीव गमावणाऱ्या प्रेक्षकांसाठी उद्या मनोरंजनाचा कोणताही उद्घाटन सोहळा होणार नाही. कडेकोट सुरक्षा व्यवस्था असली तरी स्टेडियममध्ये उपस्थित राहणाऱ्या प्रेक्षकांचा जल्लोष कसा असेल, याकडेही लक्ष असेल. सलामीच्या सामन्यातच विराट कोहली खेळणार असल्यामुळे प्रेक्षकांची उत्सुकता ताणलेली आहे.

आयपीएल दृष्टिपथात

सर्वाधिक विजेतेपेद ः प्रत्येकी ५ ः मुंबई इंडियन्स, चेन्नई सुपर किंग्ज

सर्वाधिक सामने ः मुंबई इंडियन्स २७७

सर्वाधिक विजय ः मुंबई इंडियन्स १५३

सर्वाधिक धावसंख्या ः हैदराबाद २८७/३ वि. बंगळूर २०२४

सर्वाधिक मोठा विजय ः मुंबई इंडियन्स १४६ धावांनी वि. दिल्ली २०१७

सर्वाधिक षटकार ः मुंबई इंडियन्स १८२३

सर्वाधिक चौकार ः मुंबई इंडियन्स ३८९२

सर्वाधिक २००+ धावा ः चेन्नई ३५ वेळा

सर्वाधिक सलग विजय ः कोलकाता १० (२०१४-२०१५)

एकाच ठिकाणी सर्वाधिक विजय ः मुंबई इंडियन्स ५७ (वानखेडे)