Lucknow Super Giants vs Chennai Super Kings: इंडियन प्रीमियर लीग 2023 स्पर्धेत बुधवारी डबल हेडर म्हणजेच एका दिवशी दोन सामने खेळवण्यात येणार आहे. बुधवारचा पहिला सामना लखनऊ सुपर जायंट्स विरुद्ध चेन्नई सुपर किंग्स संघात होत आहे.

या सामन्यात चेन्नईचा कर्णधार एमएस धोनीने नाणेफेक जिंकून प्रथम गोलंदाजी करण्याचा निर्णय घेतला आहे. चेन्नईचा वेगवान गोलंदाज दीपक चाहर दुखापतीतून सावरला असून त्याचे संघात पुनरागमन झाले आहे.

याशिवाय लखनऊचा नियमित कर्णधार केएल राहुल मात्र दुखापतीमुळे हा सामना खेळणार नाही. त्यामुळे कृणाल पंड्या संघाचे नेतृत्व करणार आहे. तसेच लखनऊने या सामन्यासाठी मनन वोहराला आणि करन शर्माला संधी दिली आहे.

चेन्नईने या सामन्यासाठी डेव्हॉन कॉनवे, मोईन अली, मथिशा पाथिराना आणि महिश तिक्षणा या चार परदेशी खेळाडूंना प्लेइंग इलेव्हनमध्ये संधी दिली आहे, तर लखनऊने काईल मेयर्स, मार्कस स्टॉयनिस, निकोलस पूरन आणि नवीन-उल-हक या परदेशी खेळाडूंना संधी दिली आहे. त्यामुळे दोन्ही संघांनी प्रत्येकी 4 परदेशी खेळाडूंना प्लेइंग इलेव्हनमध्ये संधी दिलेली असल्याने इम्पॅक्ट प्लेअर म्हणून केवळ भारतीय खेळाडूंनाच वापरता येणार आहे.

इम्पॅक्ट प्लेअरच्या पर्यायांसाठी राखीव खेळाडूंमध्ये चेन्नईने अंबाती रायुडू, मिचेल सँटेनर, एस सेनापती, शेख राशिद आणि आकाश सिंग यांना संधी दिली आहे, तर लखनऊने क्विंटन डी कॉक, दीपक हुडा, डॅनिएल सॅम्स, यश ठाकूर आणि प्रेरक मंकड यांना राखीव खेळाडूंमध्ये संधी दिली आहे.

असे आहेत प्लेइंग इलेव्हन

• चेन्नई सुपर किंग्स - ऋतुराज गायकवाड, डेव्हॉन कॉनवे, अजिंक्य रहाणे, मोईन अली, शिवम दुबे, रवींद्र जडेजा, एमएस धोनी (यष्टीरक्षक/कर्णधार), दीपक चाहर, मथिशा पाथीराना, तुषार देशपांडे, महिश तिक्षणा

• लखनऊ सुपर जायंट्स - काईल मेयर्स, मनन वोहरा, करण शर्मा, आयुष बदोनी, मार्कस स्टॉयनिस, निकोलस पूरन (यष्टीरक्षक), कृणाल पंड्या (कर्णधार), कृष्णप्पा गॉथम, नवीन-उल-हक, रवी बिश्नोई, मोहसिन खान