पणजी: इंडियन सुपर लीग (Indian Super League) (आयएसएल) फुटबॉल स्पर्धेत एफसी गोवा (FC Goa) मुंबई सिटी एफसीच्या (Mumbai City FC) मध्यफळीत उल्लेखनीय ठरलेला ह्यूगो बुमूस (Hugo Boomous) आगामी मोसमात कोलकात्याच्या एटीके मोहन बागानकडून खेळणार आहे. त्याचा हा करार दीर्घकालीन असल्याचे सांगण्यात येते.

गतमोसमात मुंबई सिटीने आयएसएल करंडक आणि लीग विनर्स शिल्डचा मान मिळविला होता, त्या यशात बुमूसचाही वाटा राहिला. नव्या मोसमासाठी करारबद्ध केलेला बुमूस हा एटीके मोहन बागान संघातील सहावा नवा खेळाडू आहे. बुमूसने 2017-18 पासून आयएसएल स्पर्धेत 58 सामन्यांत 19 गोल नोंल नोंदविले असून 24 असिस्टची नोंद केली आहे. 2019-20 मोसमात तो स्पर्धेतील उत्कृष्ट खेळाडू ठरला होता.त्या मोसमात त्याने एफसी गोवातर्फे 15 सामन्यांत 11 गोल व 10 असिस्टची नोंद केली होती.

गतमोसमात मुंबई सिटीने त्याला एफसी गोवाकडून संघात घेताना 1.76 कोटी रुपये मोजल्याचे वृत्त होते, आता एटीके मोहन बागानने त्याच्यासाठी त्याहून जास्त रक्कम मोजल्याची माहिती आहे. फिनलंडचा आंतरराष्ट्रीय मध्यरक्षक जोनी काऊको याच्यानंतर कोलकात्यातील संघाने करारबद्ध केलेला बुमूस हा आणखी एक प्रमुख खेळाडू आहे. गतमोसमात बुमूसला दुखापतीने सतावले होते, तसेच निलंबनामुळे तो आयएसएल स्पर्धेतील चार सामने खेळू शकला नव्हता.

कोलकात्यास भारतीय फुटबॉलची मक्का मानले जाते. या शहरातील पारंपरिक आणि यशस्वी संघाशी करार करताना मला खूप आनंद होत आहे. करंडक जिंकण्यासाठी मी नेहमीच भुकेलेला असतो. मी खेळलेल्या संघाला यापूर्वी यश मिळवून दिलेले आहे. आता पुन्हा खेळताना हेच मी ध्यानात ठेवेन. जिंकण्यासाठी मी सर्वोत्तम क्षमतेने खेळेन, असे या फ्रेंच-मोरोक्कन खेळाडूने एटीके मोहन बागानच्या संकेतस्थळास सांगितले.