ICC ODI Cricket World Cup 2023, Semi-Final Equation:

वनडे वर्ल्डकप 2023 स्पर्धा आता अंतिम टप्प्याकडे झुकत आहे. त्यामुळे आता स्पर्धेलाही रोमांचक वळण मिळाले आहे. उपांत्य फेरीत चार संघच प्रवेश करणार आहेत.

यातील भारत आणि दक्षिण आफ्रिका या संघांनी आपले स्थान पक्के केले आहे. त्यामुळे अजून दोनच संघांना संधी आहे. त्याचबरोबर इंग्लंड आणि बांगलादेश या दोन्ही संघांचे आव्हान संपुष्टात आले आहे. त्याचमुळे सध्या उपांत्य फेरीत उर्वरित दोन जागांसाठी 6 संघात स्पर्धा आहे.

रविवारी (5 नोव्हेंबर) भारताने कोलकाताला झालेल्या सामन्यात दक्षिण आफ्रिकेला पराभूत केले; त्यामुळे भारताचे गुणतालिकेतील अव्वल स्थानही पक्के झाले आहे. तसेच दक्षिण आफ्रिका सध्या 8 सामन्यांनंतर 6 विजयांसह 12 गुण मिळवत दुसऱ्या क्रमांकावर आहे. दक्षिण आफ्रिका गुणतालिकेत दुसऱ्या किंवा तिसऱ्या क्रमांकावर राहू शकतो.

सध्या गुणतालिकेनुसार तिसऱ्या क्रमांकावर ऑस्ट्रेलिया आहे. त्यांनी 7 पैकी 5 सामने जिंकले आहेत, तसेच चौथ्या क्रमांकावर न्यूझीलंड असून त्यांचे 8 सामन्यांपैकी 4 सामने जिंकले आहेत. त्यांचे 8 गुण आहेत.

या दोन्ही संघांना सध्या उपांत्य फेरीत जाण्याची सर्वात जास्त संधी आहे. पण याबरोबरच त्यांची स्पर्धा पाकिस्तान, अफगाणिस्तान, श्रीलंका आणि नेदरलँड्स या संघांबरोबर आहे.

ऑस्ट्रेलिया

ऑस्ट्रेलियाला उपांत्य फेरीत थेट पोहोचायचे असेल, तर केवळ एक सामना जिंकण्याची गरज आहे. ते एक विजय मिळवून 12 गुणांसह गुणतालिकेत दुसरा किंवा तिसरा क्रमांक मिळवू शकतात.

तसेच जरी ते दोन्ही सामने पराभूत झाले, तरी त्यांना आशा करावी लागेल की न्यूझीलंड, पाकिस्तान, अफगाणिस्तान या तीन संघांपैकी किमान दोन संघांनी 10 गुणांपर्यंत पोहचू नये, किंवा पोहचले तरी त्यांचा नेट रनरेट ऑस्ट्रेलियाहून कमी असावा.

न्यूझीलंड

त्याचबरोबर न्यूझीलंडला जर उपांत्य फेरीत पोहोचायचे असेल, तर काहीही करून श्रीलंकेविरुद्धचा सामना जिंकावाच लागेल, याबरोबरच पाकिस्तान आणि अफगाणिस्तानने त्यांचे उर्वरित सामने पराभूत व्हावेत अशी आशा करावी लागेल.

त्याचबरोबर जरी ते उर्वरित सामना पराभूत झाले, तरी त्यांना ही आशा करावी लागणार आहे की पाकिस्तान आणि अफगाणिस्तान हे संघ आपापले सामने पराभूत होतील. तसेच श्रीलंका आणि नेदरलँड्स संघांनी आपापले सामने जिंकले तरी त्यांचा नेटरनरेट न्यूझीलंडपेक्षा कमी असावा.

पाकिस्तान

पाकिस्तान संघाने आत्तापर्यंत 8 पैकी 4 सामने जिंकले आहेत, त्यामुळे त्यांचेही न्यूझीलंडप्रमाणे 8 गुण आहेत. मात्र त्यांचा नेटरनरेट न्यूझीलंडपेक्षा कमी आहे. दरम्यान पाकिस्तानसमोरही न्यूझीलंडप्रमाणेच समीकरण आहे. त्यांना उर्वरित इंग्लंडविरुद्धचा सामना जिंकावाच लागणार आहे.

त्याचबरोबर आशा करावी लागेल की न्यूझीलंड आणि अफगाणिस्तान त्यांचे उर्वरित सामने पराभूत व्हावेत. त्याचबरोबर जरी ते हा सामना पराभूत झाले, तरी त्यांना ही आशा करावी लागेल की न्यूझीलंड, अफगाणिस्तान, श्रीलंका आणि नेदरलँड्स या 8 गुणांपर्यंत पोहलेल्या किंवा पोहोचणाऱ्या संघांचा नेटरनरेट त्यांच्यापेक्षा कमी असावा.

अफगाणिस्तान

दरम्यान, अफगाणिस्तानने 7 सामने आत्तापर्यंत खेळले असून 4 सामने जिंकले आहेत आणि 8 गुण मिळवले आहेत. त्यांनाही थेट उपांत्य फेरीत जाण्याची संधी आहे. पण त्यासाठी त्यांना उर्वरित ऑस्ट्रेलिया आणि दक्षिण आफ्रिकेविरुद्ध जिंकावेच लागणार आहे.

त्याचबरोबर एका विजयासह देखील ते उपांत्य फेरीत पोहचू शकतात, पण त्यासाठीही त्यांना आशा करावी लागेल की न्यूझीलंड आणि पाकिस्तान संघ 10 गुणांपर्यंत पोहचू नयेत, त्याचबरोबर जरी ते पोहचले, तरी त्यांचा नेटरनरेट त्यांच्यापेक्षा कमी असावा.

तसेच ते एकही सामना न जिंकताही ते उपांत्य फेरीत जाऊ शकतात, पण त्यांना आशा करावी लागेल की न्यूझीलंड आणि पाकिस्तान उर्वरित सामने पराभूत व्हावे. तसेच त्यांचा नेट रनरेटही कमी व्हावा. त्याचबरोबर श्रीलंका आणि नेदरलँड्सनेही 8 गुणांपर्यंत पोहचू नये.

श्रीलंका आणि नेदरलँड्स

श्रीलंका आणि नेदरलँड्स या दोन्ही संघांसाठी उपांत्य फेरीचे दरवाजे उघडे असले, तरी खूप कमी संधी आहे. श्रीलंका आणि नेदरलँड्स या दोन्ही संघांनी आत्तापर्यंत त्यांचे प्रत्येकी ७ सामने खेळले असून २ विजय मिळवले आहेत. त्यामुळे त्यांचे ४ गुण आहेत.

त्याचमुळे त्यांना या शर्यतीत कायम राहायचे असेल, तर त्यांना त्यांचे उर्वरित दोन्ही सामने मोठ्या फरकाने जिंकावे लागतील, त्याचबरोबर न्यूझीलंड, पाकिस्तान आणि अफगाणिस्तान या तिन्ही संघांनी त्यांचे सामने पराभूत व्हावेत अशी आशा करावी लागेल.