पणजी: संतोष करंडक राष्ट्रीय फुटबॉल स्पर्धेत (Santosh Trophy National Football Tournament) यंदा 75 वी आवृत्ती असून गोव्याची (Goa) मोहीम 24 नोव्हेंबरपासून सुरू होईल. गोव्याचा पश्चिम विभागीय पात्रता फेरीत अ गटात समावेश असून गुजरात, दमण-दीव, दादरा आणि नगर हवेली हे प्रतिस्पर्धी आहेत. पश्चिम विभागीय ब गटात राजस्थान, महाराष्ट्र व मध्य प्रदेशला समावेश आहे. अ गट सामने भावनगर येथे, तर ब गट सामने जयपूर येथे खेळले जातील. प्रत्येक गटातील विजेता संघ राष्ट्रीय स्पर्धेच्या मुख्य फेरीत खेळेल. ही स्पर्धा नंतर केरळमध्ये होणार आहे. गोव्याचा पश्चिम विभागीय अ गट फेरीत पहिला सामना 24 नोव्हेंबरला दमण-दीव संघाविरुद्ध होईल. नंतर 26 नोव्हेंबरला दादरा आणि नगर हवेली संघाविरुद्ध, तर गुजरातविरुद्ध 28 नोव्हेंबरला सामना होईल.

गतमोसमात कोविड-19 महामारीमुळे संतोष करंडक स्पर्धा झाली नव्हती. त्यापूर्वी 2019-20 मोसमातही पात्रता फेरीनंतर मुख्य फेरी कोरोना विषाणू महामारीमुळे होऊ शकली नव्हती. गोव्याने राष्ट्रीय स्पर्धेत 13 वेळा अंतिम फेरी गाठली असून पाच वेळा विजेतेपद, तर आठ वेळा उपविजेतेपद मिळविले आहे. शेवटच्या वेळेस गोव्याने ही स्पर्धा 2008-09 मोसमात जिंकली होती. 2018-19 मोसमात गोव्याने उपांत्य फेरीपर्यंत मजल गाठली होती.