Female spectator and Police officer fight at Narendra Modi Stadium, Ahmedabad: इंडियन प्रीमियर लीग 2023 स्पर्धेत अंतिम सामना चेन्नई सुपर किंग्स विरुद्ध गुजरात टायटन्स संघात अहमदाबादमधील नरेंद्र मोदी स्टेडियममध्ये होणार आहे. हा सामना रविवारी सुरु होणार होता. पण रविवारी संध्याकाळी अहमदाबादमध्ये जोरदार पाऊस कोसळत असल्याने हा सामना सोमवारी राखीव दिवशी खेळवण्यात येणार आहे.

दरम्यान, रविवारी हा सामना होईल या आशेने हजारो चाहते स्टेडियममध्ये उपस्थित होते. याचदरम्यान एक धक्कादायक प्रकार घडल्याची चर्चा आहे. सध्या एक व्हिडिओ सोशल मीडियावर व्हायरल होत आहे.

हा व्हिडिओ रविवारचा आयपीएल 2023 च्या अंतिम सामन्यावेळीचा असल्याचा दावा अनेक सोशल मीडिया युजर्सकडून करण्यात आला आहे. या व्हिडिओमध्ये एक महिला प्रेक्षक आणि एक पोलीस कर्मचारी यांच्यात झटापट झाल्याचे दिसत आहे.

यामध्ये महिला प्रेक्षक पोलीस कर्मचाऱ्याला मारताना आणि ढकलतानाही दिसली आहे. यावेळी इतर प्रेक्षकही ही घटना पाहाताना दिसत आहेत. पण यादरम्यान, नक्की काय घडले याबद्दल स्पष्ट माहिती मिळालेली नाही. तसेच ही झटापट कोणत्या कारणाने झाली, हे देखील अद्याप समजलेले नाही.

अंतिम सामना राखीव दिवशी

आयपीएल 2023 मधील चेन्नई सुपर किंग्स आणि गुजरात टायटन्स यांच्यात होणारा अंतिम सामना आता रविवारऐवजी सोमवारी खेळवला जाणार आहे. रविवारी रात्री 11 वाजेपर्यंत सामना पाऊस थांबण्याची वाट पाहाण्यात आली. पण पाऊसाच्या सरी कोसळत होत्या. तसेच मैदानही ओले झाल्याने सामनाधिकाऱ्यांनी हा सामना राखीव दिवशी म्हणजे सोमवारी घेण्याचा निर्णय घेतला.

आता सोमवारी संध्याकाळी 7.30 वाजता हा सामना सुरु होणार असून त्यापूर्वी नाणेफेक घेतली जाईल.

तिकिट्स असणाऱ्या चाहत्यांना मिळणार प्रवेश

रविवारी सामना रद्द झाला असला आणि सोमवारी सामना होणार असला, तरी या सामन्यासाठी तिकिट्स घेतलेल्या चाहत्यांची निराशा होणार नाही. कारण बीसीसीआयकडून सांगण्यात आले आहे की चाहत्यांनी या सामन्यासाठी घेतलेली प्रिंटेड तिकिट्स जपून ठेवा. कारण याच तिकिट्सनुसार चाहत्यांना राखीव दिवशी स्टेडियममध्ये प्रवेश दिला जाणार आहे.