Weather Report Chennai Super Kings vs Gujarat Titans IPL 2023 Final Match: इंडियन प्रीमियर लीग 2023 स्पर्धेत अंतिम सामना चेन्नई सुपर किंग्स विरुद्ध गुजरात टायटन्स संघात होणार आहे. अहमदाबादच्या नरेंद्र मोदी स्टेडियमवर हा सामना होणार आहे. या सामन्यानंतर आयपीएल 2023 चा विजेता संघ मिळणार आहे.
पण, या सामन्यावर पावसाचे सावट आहे. रविवारी संध्याकाळी जोरदार पाऊस पडत असल्याने नाणेफेकीसही उशीर झाला. त्यामुळे या सामन्यात पावसामुळे अडथळा आला, तर काय निर्णय घेतले जाऊ शकतात याचा आढावा घेऊ.
जर पाऊस आला, तर किमान निकाल येण्यासाठी 5 षटकांचा खेळ होणे गरजेचे आहे. पाच-पाच षटकांच्या खेळासाठी कटऑफ वेळ रात्री 12 वाजून 06 मिनिटापर्यंत आहे. दरम्यान, जर 9 वाजून ३५ मिनिटापर्यंत सामना सुरू झाला, तर पूर्ण 20-20 षटकांचा सामना होणार आहे.
पण रविवारी जर सामना झाला नाही, तर सोमवारी (29 मे) अंतिम सामन्यासाठी राखीव दिवस आहे.
त्यामुळे जर रविवारी सामना सुरू झाला असेल, पण जर तो रविवारी पूर्ण झाला नाही, तर जिथे सामना थांबला आहे, तिथूनच सोमवारी सामना सुरू होईल. तसेच रविवारी केवळ नाणेफेक झाली आणि सामना सुरू झाला नाही, तर सोमवारी पुन्हा नव्याने नाणेफेक होईल. अशा परिस्थितीत संघांना प्लेइंग इलेव्हनमधील खेळाडूही बदलता येऊ शकतात.
याशिवाय जर किमान 5 षटकांचाही सामना झाला नाही, तर सुपर ओव्हर खेळवली जाऊ शकते. यासाठी कटऑफ वेळ रात्री 1 वाजून 20 मिनिटापर्यंत आहे.
या सर्व परिस्थितीतही सामना पूर्ण झाला नाही, तर मात्र गुणतालिकेत गुजरात टायटन्स चेन्नईच्या पुढे अव्वल स्थानावर असल्याने त्यांना विजेते घोषित केले जाईल.
दरम्यान, या अंतिम सामन्यात एमएस धोनीच्या नेतृत्वाखाली चेन्नई सुपर किंग्स खेळणार असून गुजरात टायटन्स हार्दिक पंड्याच्या नेतृत्वाखाली खेळणार आहे. अंतिम सामन्यात जर चेन्नई सुपर किंग्सने विजेतेपद जिंकले, तर हे त्यांचे आयपीएलमधील पाचवे विजेतेपद असेल. तसेच गुजरातने विजेतेपद जिंकले, तर त्यांचे हे सलग दुसरे आयपीएल विजेतेपद असेल.
चेन्नईने यापूर्वी 2010, 2011, 2018 आणि 2021 या वर्षी आयपीएल विजेतेपद जिंकले आहे. तसेच गुजरातने गेल्यावर्षी पहिल्यांचा आयपीएलमध्ये खेळताना विजेतेपदाला गवसणी घातली होती.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.