आय-लीग फुटबॉल स्पर्धेतील (I League Football) सलग दोन पराभवानंतर गोव्याच्या चर्चिल ब्रदर्सने (Churchill Brothers) पहिल्या गुणाची कमाई केली. सामन्यातील सहा मिनिटे बाकी असताना गोल नोंदवत त्यांनी मुंबई केंकरे एफसीला (Mumbai Kenkre FC) 1-1 असे गोलबरोबरीत रोखले.

(Churchill Brothers share spoils with Mumbai Kenkre FC to score first point)

सामना गुरुवारी मुंबई येथील कुपरेज मैदानावर झाला. सामन्याच्या सहाव्याच मिनिटास अजफर नूरानी याच्या गोलमुळे मुंबई केंकरे संघाने आघाडी प्राप्त केली. चर्चिल ब्रदर्सची वाटचाल आणखी एका पराभवाच्या दिशेने असताना लाल्खॉपुईमाविया याने 84व्या मिनिटास दोन वेळच्या माजी विजेत्यांना बरोबरी साधून दिली. त्याचा हा सलग दुसऱ्या सामन्यातील गोल ठरला.

मुंबई केंकरे एफसीचे आता तीन लढतीतून चार गुण झाले आहेत. तेवढेच सामने खेळलेल्या चर्चिल ब्रदर्सचा फक्त एक गुण आहे. त्यांचा पुढील सामना रियल काश्मीरविरुद्ध होईल. घरच्या मैदानावर बांबोळी येथील चर्चिल ब्रदर्सला अगोदरच्या लढतीत राजस्थान युनायटेड व श्रीनिदी डेक्कन संघाकडून हार पत्करावी लागली होती.

श्रीनिदी डेक्कनचा सलग दुसरा विजय

आय-लीग स्पर्धेत गुरुवारी हैदराबाद येथे झालेल्या आणखी एका सामन्यात श्रीनिदी डेक्कन संघाने ट्राऊ (टिड्डिम रोड ॲथलेटिक युनियन) एफसीवर 1-0 फरकाने मात केली. डेव्हिड मुनोझ याने 41 व्या मिनिटास केलेल्या गोलमुळे श्रीनिदी डेक्कनला सलग दुसरा विजय नोंदविता आला. तीन सामन्यांनंतर त्यांचे आता सहा गुण झाले आहेत. ट्राऊ एफसीचा हा पहिला पराभव ठरला, त्यामुळे तीन लढती खेळल्यानंतर त्यांचे चार गुण कायम राहिले.