David Warner on Test Retirement: ऑस्ट्रेलियाचा स्टार फलंदाज डेव्हिड वॉर्नर याने नुकतेच मोठी प्रतिक्रिया दिली आहे. त्याने पुढीलवर्षी जानेवारीमध्ये कसोटी कारकिर्द संपवण्याची इच्छा व्यक्त केली आहे. ऑस्ट्रेलियाला डिसेंबर 2023 - जानेवारी 2024 दरम्यान पाकिस्तानविरुद्ध कसोटी मालिका खेळायची आहे. या मालिकेत वॉर्नर कसोटी जर्सीत अखेरचा दिसण्याची शक्यता आहे.

भारत आणि ऑस्ट्रेलिया संघात 7 जूनपासून सुरू होणाऱ्या कसोटी चॅम्पियनशीपच्या अंतिम सामन्यापूर्वी बेकनहॅम येथे पत्रकारांशी बोलताना वॉर्नरने सांगितले आहे की त्याला आशा आहे की तो जानेवारीमध्ये सिडनी येथे पाकिस्तानविरुद्ध अखेरचा कसोटी सामना खेळून त्याची कसोटी कारकिर्द संपवू शकेल.

36 वर्षीय वॉर्नर पुढीलवर्षी पाकिस्तानविरुद्धच्या कसोटी मालिकेनंतर वेस्ट इंडिजविरुद्ध होणाऱ्या 2 सामन्यांच्या कसोटी मालिकेतून बाहेर झाला आहे. पण असे असले तरी 2024 टी20 वर्ल्डकपपर्यंत मर्यादीत षटकांच्या क्रिकेटमध्ये तो खेळत राहणार असल्याचे त्याने सांगितले आहे.

वॉर्नरने शनिवारी (3 जून) सांगितले की 'तुम्हाला धावा काढाव्या लागतील. मी यापूर्वीही सांगितले आहे. 2024 वर्ल्डकपमध्ये कदाचीत माझ्या कारकिर्दीतील अखेरचा सामना असेल. मी माझा आणि माझ्या कुटुंबाचा ऋणी आहे.'

'जर मी येथे (कसोटी चॅम्पियनशीप अंतिम सामना आणि ऍशेस) धावा काढू शकलो आणि परत ऑस्ट्रेलियात जाऊन खेळू शकलो, तर मी नक्कीच वेस्ट इंडिजविरुद्धची कसोटी मालिका खेळणार नाही.'

मी कदाचित ते माझे आणि माझ्या कुटुंबाचे ऋणी आहे - जर मी येथे धावा काढू शकलो आणि ऑस्ट्रेलियात खेळणे सुरू ठेवले तर - मी निश्चितपणे सांगू शकतो की मी वेस्ट इंडिजची ती मालिका खेळणार नाही.'

'जर मी कसोटी चॅम्पियनशीप अंतिम सामना आणि ऍशेस यातून पुढे गेलो आणि पाकिस्तानविरुद्धच्या मालिकेत खेळलो. तर मला तिथे कसोटी कारकिर्दीचा शेवट करण्यास आनंद होईल.'

दरम्यान, वॉर्नरचा आगामी कसोटी चॅम्पियनशीप 2021-23 स्पर्धेच्या अंतिम सामन्यासाठी आणि 16 जूनपासून इंग्लंडविरुद्ध सुरु होणाऱ्या 5 कसोटी सामन्यांच्या ऍशेस मालिकेसाठी ऑस्ट्रेलिया संघात समावेश आहे.

वॉर्नरची कसोटी कारकिर्द

डेव्हिड वॉर्नरने त्याच्या कसोटी कारकिर्दीत 103 सामने खेळले असून या सामन्यांमध्ये त्याने 45.57 सरासरीने 8158 धावा केल्या आहेत. यात त्याच्या 25 शतकांचा आणि 34 अर्धशतकांचा समावेश आहे. त्याने 4 विकेट्सही घेतल्या आहेत.