टी-२० विश्वचषक २०२६ चा अंतिम सामना आज (८ मार्च) भारत आणि न्यूझीलंड यांच्यात खेळला जाणार आहे. या महामुकाबल्यापूर्वी भारतीय संघातील युवा सलामीवीर अभिषेक शर्मा चर्चेत आहे. संपूर्ण स्पर्धेत अभिषेकला आपली लय गवसलेली नाही, तरीही त्याच्या क्षमतेवर सर्वांचा विश्वास आहे. अशा महत्त्वाच्या प्रसंगी अभिषेकचे वडील राज कुमार शर्मा यांनी आपल्या मुलाच्या कामगिरीवर भाष्य करत त्याच्या मनात विजयाचा विश्वास निर्माण केला आहे. अभिषेकच्या वडिलांनी दिलेली ही साथ त्याला नक्कीच मानसिक बळ देणारी ठरणार आहे.

'अभिषेक मॅच विनिंग खेळी करेल'

एका वृत्तवाहिनीशी बोलताना राज कुमार शर्मा यांनी अतिशय सकारात्मक प्रतिक्रिया दिली. ते म्हणाले, "माझा अभिषेकवर पूर्ण विश्वास आहे. तो या अंतिम सामन्यात नक्कीच चांगला खेळेल आणि भारताला विश्वविजेते बनवण्यात मोलाची भूमिका बजावेल."

वडिलांचे हे शब्द अभिषेकसाठी 'टर्निंग पॉईंट' ठरू शकतात. जेव्हा एखादा खेळाडू खराब फॉर्मशी झुंजत असतो, तेव्हा घरच्यांचा पाठिंबा त्याला पुन्हा मैदानात उभे राहण्याची ताकद देतो. न्यूझीलंडसारख्या बलाढ्य गोलंदाजी आक्रमणाविरुद्ध अभिषेक पॉवरप्लेमध्येच सामन्याचे चित्र पालटण्याची क्षमता ठेवतो, हे त्याने यापूर्वी अनेकदा सिद्ध केले आहे.

आकडेवारी काय सांगते?

अभिषेक शर्माच्या आकडेवारीवर नजर टाकली तर, त्याने २०२४ मध्ये पदार्पण केल्यापासून ४५ टी-२० सामन्यांत १३८६ धावा केल्या आहेत. त्याचे दोन शतके आणि नऊ अर्धशतके त्याच्या आक्रमकतेची साक्ष देतात.

विशेष म्हणजे १८८.८ चा स्ट्राइक रेट असलेला हा फलंदाज जेव्हा फॉर्ममध्ये असतो, तेव्हा तो गोलंदाजांची धुलाई करतो. विश्वचषकापूर्वी न्यूझीलंडविरुद्ध झालेल्या मालिकेतही त्याने ८४ आणि नाबाद ६८ धावांच्या खेळी करत कीवी गोलंदाजांवर दबाव निर्माण केला होता. त्याच आठवणींची उजळणी आजच्या फायनलमध्ये करण्याचे आव्हान त्याच्यासमोर आहे.

इतिहास घडवण्याची वेळ

आज अहमदाबादच्या मैदानावर होणारा हा सामना केवळ एक मॅच नसून भारतासाठी इतिहास घडवण्याची संधी आहे. अभिषेक शर्माला त्याच्या नैसर्गिक खेळात परतण्यासाठी हा सुवर्णकाळ आहे. जर आज त्याच्या बॅटने धावा काढल्या, तर तो केवळ चाहत्यांची मने जिंकणार नाही, तर भारताला सलग दुसऱ्यांदा टी-२० विश्वचषक जिंकून देण्यातही सिंहाचा वाटा उचलेल. चाहत्यांच्या नजरा आता २६ वर्षीय या युवा खेळाडूवर खिळल्या आहेत.