Healthy Breakfast for Monsoon: पावसाळ्यात सकाळी नाश्त्यात काय बनवावे हा प्रश्न सर्वांनाच असतो. सकाळी ऑफिसला जायची घाई असल्याने झटपट काय बनवावे सुचत नाही.

तुम्ही जर पावसाळ्यात भजे, समोसे आणि पकोडे खाऊन बोर झाला असाल तर आम्ही तुम्हाला आज हेल्दी आणि चविष्ट रेसिपी सांगणार आहोत.

तुम्ही मसाला डोसा, पेपर डोसा यासारखे डोसाचे अनेक प्रकार खाल्ले असेल,पण कधी ओट्स डोसा ट्राय केला आहे का? नाही! तर ही झटपट तयार होणारी आणि हेल्दी रेसिपी नक्की ट्राय करुन पाहा.

• ओट्स डोसा बनवण्यासाठी लागणारे साहित्य

एक कप ओट्स

1/4 कप तांदळाचे पीठ

1/4 कप रवा

1/4 कप दही

अर्धा टीस्पून जिरे

चवीनुसार मीठ

एक कांदा

कढीपत्ता

कोथिंबीर

आल्याचा एक इंच लांब तुकडा

हिरव्या मिरच्या

आवश्यकतेनुसार पाणी

• ओट्स डोसा बनवण्याची कृती

ओट्स डोसा बनवण्यासाठी आधी रेडी टू इट ओट्स घ्यावे. त्याची बारीक पावडर करा. एका मोठ्या भांड्यात काढावे आणि त्यात तांदळाचे पीठ आणि रवा एकत्र करवे. तसेच चवीनुसार मीठ आणि जिरे घालावे. बारीक चिरलेला कांदा, आल्याचा तुकडा मिक्स करा.

सोबत बारीक चिरलेली हिरवी मिरची, कोथिंबीर, कढीपत्ता घाला. शेवटी दही घालून मिक्स करावे. आता या बॅटरमध्ये थोडे पाणी घालावे. ओट्स डोसामध्ये पाण्याचे प्रमाण तांदळाच्या डोस्यापेक्षा जास्त असावे. याचे बॅटर एकदम पातळ असले पाहिजे. आता हे बॅटर सेट होण्यासाठी अर्धा तास सोडावे.

आता तवा किंवा पॅन गरम करून त्यावर ओट्स डोसा पसरवा. काही वेळाने उलटा करून प्लेटमध्ये काढा. ओट्स डोसा पीठ पातळ असते, म्हणून ते तव्यावर पसरवण्याची गरज नाही. कोणत्याही चमचाच्या मदतीने तव्यावर टाका आणि सोडा. दोन्ही बाजूंनी सोनेरी तपकिरी रंगावर शिजवा. नारळ किंवा शेंगदाणा चटणीसह गरम सर्व्ह करा.