मोरजी: पोरस्कडे, धारगळ, तुये, पार्से या परिसरात प्रचारावेळी मतदारांनी स्पष्टपणे सांगितले, की आम्ही केवळ भाजप-मगो युतीलाच मतदान करणार आणि त्याच बळावर धारगळमधून भाजप-मगो युतीचे उमेदवार श्रीकृष्ण हरमलकर विजयी होतील, असा विश्वास मांद्रेचे आमदार जीत आरोलकर यांनी व्यक्त केला.

हरमलकर यांनी सांगितले, की आपल्याला आमदार जीत आरोलकर, आमदार प्रवीण आर्लेकर, माजी आमदार दयानंद सोपटे यांचा पाठिंबा आहेच. शिवाय धारगळ, पोरस्कडे, तुये, विर्नोडा पार्से या पंचायतींचे सरपंच, उपसरपंच, पंच सदस्य प्रत्येक गावातील जास्तीत जास्त मतदारांचा पाठिंबा असल्यामुळे आपला विजय निश्चित आहे. आपल्याला एक संधी देऊन विकास कशा पद्धतीने करणार हे जनतेने पहावे, असेही ते म्हणाले.

यावेळी पार्सेचे सरपंच अजय कलंगुटकर पंच अजित मोरजकर, उषा नागवेकर, लक्ष्मीकांत गवंडी, रुद्रेश नागवेकर, दयानंद मांजरेकर, पोरस्कडे सरपंच सिद्धी गडेकर, माजी सरपंच निशा हळदणकर, तुये माजी सरपंच सुहास नाईक, जिल्हा पंचायत सदस्य मनोहर धारगळकर आदी समर्थक उपस्थित होते.

सरपंच अजय कलंगुटकर म्हणाले, युतीच्या उमेदवाराचे चिन्ह आणि जाहीरनामा आम्ही घरोघरी पोहोचवून त्यांना जास्तीत जास्त मताधिक्य देण्यासाठी आमचे प्रयत्न आहेत. जिल्हा पंचायत सदस्य मनोहर धारगळकर यांनी आपण जिल्हा पंचायत सदस्य असताना ४.१५ कोटींचा निधी वापरून या मतदार संघाचा विकास केलेला आहे. आता उर्वरित विकास कामांसाठी हरमलकर यांना जनता शंभर टक्के संधी देईल.