फोंडा : शिरोडा पंचायतीच्या प्रभाग क्रमांक चारसाठी मतदान करून घरी परतणाऱ्या पती पत्नीच्या दुचाकीवर वडाचे झाड कोसळून पत्नीचा दुर्दैवी घटना आज बुधवारी संध्याकाळी पाचच्या सुमारास घडली.

पोलिसांनी दिलेल्या माहितीनुसार, सातोरे - शिरोडा येथील व्यंकटेश घनशाम नाईक (वय 44) व त्याची पत्नी अदिती व्यंकटेश नाईक (वय 39) हे शिरोडा पंचायतीच्या प्रभाग क्रमांक चार मधील तारीवाडा येथील मतदान केंद्रात गेली होती. मतदान करून जीए 05 सी 8306 या दुचाकीने घरी परतत असताना शिरवाडा येथे पोचल्यावर रस्त्याच्या कडेला असलेले भले मोठे वडाचे झाड अचानक खाली कोसळले. या वडाच्या झाडाखाली दुचाकीसह नाईक दांपत्य सापडले त्यात अदिती नाईक ही गंभीर जखमी झाली. यावेळी लगतच्या घरातील लोकांनी घटना स्थळी धाव घेऊन झाडाच्या फांदीखाली अडकलेल्या आदितीला बाहेर काढले त्यानंतर दोघाही जखमी पती पत्नीला शिरोडा आरोग्य केंद्रात उपचारासाठी नेले असता . आदितीला तेथील डॉक्टरांनी मृत घोषित केले.

नाईक दांपत्याला दोन मुले असून फोंडा पोलिसांनी अपघाताचा पंचनामा केला. दरम्यान फोंडा अग्निशामक दलाला या दूर्घटने संबंधी कळवल्यानंतर त्यांनी घटनास्थळी धाव घेऊन रस्त्यावरील झाड हटवले.