Margao Latest News Today
मडगाव: गोव्‍यात वेगवेगळ्‍या ठिकाणी महिलांच्‍या सोनसाखळ्या हिसकावून लांबवणाऱ्या आणि अडगळीच्‍या जागेवर लोकांना अडवून त्‍यांना लुटणाऱ्या आगुस्‍तीन कार्व्हालो या कुख्‍यात चेन स्‍नॅचरला कर्नाटक पोलिसांनी शेवटी गोकर्ण येथे काल अटक केली.
या चोरट्याला सध्‍या पर्वरी पोलिसांच्या ताब्‍यात देण्‍यात आले आहे. या कुख्‍यात गुन्‍हेगाराच्‍या विरोधात गोव्‍यात वेगवेगळ्‍या पोलिस स्‍थानकात २५ हून जास्‍त गुन्‍हे नोंद झाले असून त्‍यातील काही गुन्‍ह्यात त्‍याला शिक्षाही झालेली आहे.
आगुस्‍तीन कार्व्हालो हा माजोर्डा येथे रहाणारा असून मागचे काही महिने तो फरार होता. गोव्यातील काही गुन्‍ह्यात तो गोवा पोलिसांना हवा होता. त्‍यामुळे त्‍याच्‍या विरोधात लुकआऊट नोटीस जारी केली होती. काल कर्नाटक पोलिसांना तो गोकर्ण परिसरात फिरताना सापडल्‍याने तिथे त्‍याला अटक केली.
वाटेत निर्जनस्‍थळी सापडलेल्‍या महिलांना गाठून त्‍यांच्‍या अंगावरील चेन्‍स चोरण्‍याच्‍या तसेच रात्रीच्‍यावेळी ट्रक चालकांना अडवून आपण पोलिस असे सांगून त्‍यांना लुटण्‍याच्‍या अनेक घटनात कार्व्हालो याचा हात असून काही महिन्‍यापूर्वी त्‍याने कोलवा येथे एका विक्रेत्‍यालाही अशीच धमकी देऊन पैसे उकळले होते. किनारी भागातील व्‍यावसायिकांना तो आपण पोलिस असल्‍याचे सांगून त्‍यांना धमकावून त्‍यांच्‍याकडून पैसे काढून घेत होता.
तोतया पोलिस म्‍हणून गुन्‍हेगारी वर्तुळात परिचित या आगुस्‍तीन विरोधात मडगाव पोलिसात ८, मायणा कुडतरी पोलिसात ५, कोलवा आणि केपे पोलिस स्‍थानकात प्रत्‍येकी दोन तर हणजुणा, आगशी, पर्वरी, ओल्‍ड गोवा, मुरगाव, कुंकळ्‍ळी, पेडणे व वेर्णा पोलीस स्‍थानकात प्रत्‍येकी एक गुन्हा नोंद झाला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.