Sulakshana Sawant Vs Sanjay Singh

पणजी: कॅश फॉर जॉब प्रकरणात मुख्यमंत्री प्रमोद सावंत यांच्या पत्नीवर आरोप केल्याप्रकरणी आप नेते, राज्यसभा खासदार संजय सिंह अडचणीत सापडले आहेत. मुख्यमंत्री सावंत यांच्या पत्नी सुलक्षणा सावंत यांच्या सिंह यांच्याविरोधात १०० कोटी रुपये मानहानीचा खटला दाखल केला आहे. यावरुन आता राजकारण तापले असून, मानहानीचा खटला दाखल करणे एका कटाचा भाग असल्याचा आपने आरोप केला आहे.

गोवा आपचे महासचिव वाल्मिक नाईक यांच्यासह इतर नेत्यांनी पत्रकार परिषद घेत भाजप आणि मुख्यमंत्री सावंत यांच्यावर टीका केली. मुख्यमंत्री प्रमोद सावंत यांच्या पत्नीने संजय सिंह यांच्याविरोधात दाखल केलेला मानहानीचा खटला म्हणजे त्यांना दिल्ली विधानसभा निवडणुकीच्या प्रचारापासून दूर ठेवण्याचा कट आहे, असे नाईक म्हणाले. दिल्ली विधानसभेची निवडणूक येत्या फेब्रुवारीत जाहीर होण्याची शक्यता आहे.

संजय सिंह यांना न्यायालयीन सुनावणीसाठी गोव्यात यावे लागेल, या केसमुळे वेळ वाया जाईल आणि ते निवडणूक प्रचारावर लक्ष केंद्रित करू शकणार नाहीत. संजय सिंह आपचे प्रमुख प्रचारक आहेत. पण, केसमुळे त्यांना दिल्लीत लक्ष घालता येणार नाही, त्यामुळे हा खटला दाखल करण्यात आल्याचा आरोप नाईक यांनी केला. तसेच, कोठडीतून फरार सिद्दीकी उर्फ सुलेमान खान या प्रकरणावरुन लक्ष विचलित करण्यासाठी देखील हा खटाटोप केला असावा, असे नाईक म्हणाले.

गोवा मुख्यमंत्र्यांच्या पत्नी सुलक्षणा सावंत यांनी मंगळवारी (१७ डिसेंबर) उत्तर गोव्यातील डिचोली गावातील न्यायालयात संजय सिंह यांच्याविरोधात मानहानीचा खटला दाखल केला. सिंह यांनी नोकरी घोटाळ्यात आपले नाव घेतल्याचा आरोप त्यांनी केलाय. या अंतर्गत त्यांनी आप नेत्याकडे 100 कोटी रुपयांची भरपाई मागितलीय. न्यायालयाने याप्रकरणी सिंह यांना नोटीस बजावली असून, 10 जानेवारी 2025 पर्यंत उत्तर मागितले आहे.