Goa Monsoon 2025

पणजी: गोव्यात हवामान खात्याने २० ऑगस्टपर्यंत यलो अलर्ट जारी केला असून, मुसळधार पावसाची शक्यता वर्तवली आहे. गेल्या काही दिवसांपासून पावसांना राज्यात विश्रांती घेतल्यानंतर पुन्हा पाऊस सक्रिय होण्याचा अंदाज आहे. दोन्ही जिल्ह्यात जोरदार सरी बरसण्याची शक्यता वेधशाळेने वर्तवली आहे.

हवामान खात्याच्या वेधशाळेने दिलेल्या माहितीनुसार, १५ ते २० ऑगस्ट २०२५ या काळात उत्तर आणि दक्षिण गोव्यात मुसळधार पावसाची शक्यता आहे. या काळात राज्यात ३० ते ४० प्रतितास किलोमीटर वेगाने वारे वाहण्याची शक्यता आहे.

आज राज्यात बहुतांश ठिकाणी ढगाळ वातावरण पाहण्यास मिळाले, पण किरकोळ सरी वगळता कुठे मोठ्या प्रमाणात पाऊस झाला नाही.

हवामान खात्याच्या ताज्या अपडेटनुसार, दोन्ही जिल्ह्यात पुढील तीन तासांत हलक्या ते मध्यम स्वरुपाच्या पावसाची शक्यता आहे. उत्तर गोव्यात काही ठिकाणी तर दक्षिण गोव्यात धारबांदोडा आणि सांगे तालुक्यात पावसाचे ढग असून, पावसाची शक्यता वेधशाळेने वर्तवली आहे.

गेल्या चोवीस तासांत धारबांदोडा येथे ७६.६ आणि फोंडा येथे ६५.८ मिली मिटर पावसाची नोंद झाली. तसेच, म्हापसा येथे २१, काणकोण ५०.४, साखळी ४५.८, ओल्ड गोवा ४०.४, सांगे ३८.६, पणजी २३.८, मुरगाव २२.६ आणि पेडणे २०.८ आणि दाबोळी येथे १४ मिमि पावसाची नोंद झाली आहे.