IND vs ENG: वानखेडेवर रंगणार भारत-इंग्लंड सेमीफायनलचा थरार; बदला घेण्यासाठी इंग्लिश संघ सज्ज, पाहा संभाव्य 'प्लेइंग 11'

मुंबई: टी-२० विश्वचषक २०२६ चा फिव्हर आता शिगेला पोहोचला आहे. ५ मार्च २०२६ रोजी मुंबईच्या ऐतिहासिक वानखेडे स्टेडियमवर क्रिकेट विश्वातील दोन दिग्गज संघ, भारत आणि इंग्लंड, उपांत्य फेरीत आमने-सामने येणार आहेत. संपूर्ण स्पर्धेत दोन्ही संघांनी आतापर्यंत धडाकेबाज कामगिरी केली असली, तरी घरच्या मैदानावर खेळणारा भारतीय संघ जेतेपदासाठी प्रबळ दावेदार मानला जात आहे. मागील विश्वचषकात भारताने इंग्लंडला धूळ चारली होती, त्यामुळे या पराभवाचा वचपा काढण्यासाठी जोस बटलरची सेना पूर्ण ताकदीनिशी मैदानात उतरेल.

इंग्लंडच्या संघात मोठ्या बदलाचे संकेत

उपांत्य फेरीच्या या निर्णायक सामन्यासाठी इंग्लंड आपल्या संघात महत्त्वाचा बदल करण्याची शक्यता आहे. वानखेडेची खेळपट्टी वेगवान गोलंदाजांना उसळी देण्यासाठी ओळखली जाते. ही बाब लक्षात घेता, फिरकीपटू रेहान अहमदच्या जागी वेगवान गोलंदाज जेमी ओवरटनला संघात स्थान दिले जाऊ शकते.

असे असले तरी, लियाम डॉसन, आदिल रशीद आणि विल जॅक्सच्या रूपाने इंग्लंडकडे फिरकीचे चतुर पर्याय उपलब्ध असतील. फलंदाजीची धुरा जोस बटलर आणि हॅरी ब्रूक यांच्या खांद्यावर असेल, जे कोणत्याही क्षणी सामन्याचे चित्र पालटू शकतात.

टीम इंडियाची 'विनिंग कॉम्बिनेशन'वर भिस्त

दुसरीकडे, भारतीय संघ सध्या जबरदस्त फॉर्ममध्ये असून संघात बदल होण्याची शक्यता फार कमी आहे. अभिषेक शर्मा आणि संजू सॅमसनची जोडी सलामीला प्रतिस्पर्धी गोलंदाजांचा समाचार घेत आहे, तर इशान किशन तिसऱ्या क्रमांकावर आपली भूमिका चोख बजावत आहे.

गोलंदाजीमध्ये जसप्रीत बुमराहचा भेदक मारा आणि वरुण चक्रवर्तीची फिरकी ही भारताची मोठी ताकद ठरली आहे. कर्णधार सूर्यकुमार यादव आपल्या संघात ढवळाढवळ न करता त्याच आत्मविश्वासाने मैदानात उतरण्याची चिन्हे आहेत.

इंग्लंडचा संभाव्य संघ: फिल साल्ट, जोस बटलर (यष्टीरक्षक), जेकब बेथेल, टॉम बँटन, हॅरी ब्रूक (कर्णधार), सॅम करन, विल जॅक्स, जेमी ओव्हरटन, लियाम डॉसन, जोफ्रा आर्चर, आदिल रशीद.

भारताचा संभाव्य संघ: अभिषेक शर्मा, संजू सॅमसन, इशान किशन, सूर्यकुमार यादव (कर्णधार), तिलक वर्मा, हार्दिक पांड्या, शिवम दुबे, अक्षर पटेल, वरुण चक्रवर्ती, जसप्रीत बुमराह, अर्शदीप सिंग.