Goa Weather: गोव्यात निसर्गाचा 'डबल गेम'! दुपारी अंगाची लाहीलाही तर रात्री हुडहुडी; पाहा हवामान खात्याचा नवा इशारा

पणजी: गेल्या काही दिवसांपासून गोवा राज्यात विचित्र हवामानाचा अनुभव येत आहे. निसर्गाच्या या लहरीपणामुळे गोवेकर सध्या 'दुपारी उन्हाळा आणि रात्री हिवाळा' अशा दुहेरी हवामानाचा सामना करत आहेत. पणजी वेधशाळेने दिलेल्या माहितीनुसार, राज्याच्या कमाल तापमानात मोठी वाढ झाली असून येत्या दोन-तीन दिवसांत उष्णतेचा पारा ३५ अंश सेल्सिअसपर्यंत पोहोचण्याची शक्यता वर्तवण्यात आली आहे.

वेधशाळेचा इशारा

मागील ४८ तासांत राज्याच्या विविध भागांत उष्णतेच्या झळा तीव्र झाल्या आहेत. सोमवारी कमाल तापमान ३२.३ अंश सेल्सिअस नोंदवले गेले, तर किमान तापमान २१.६ अंशांच्या आसपास राहिले. दिवसा कडक ऊन पडत असल्यामुळे नागरिक हैराण झाले आहेत, तर सूर्यास्तानंतर वातावरणात अचानक सौम्य गारवा जाणवू लागतो. हवामान खात्याने स्पष्ट केले आहे की, हा ऋतुबदलाचा काळ असून उत्तरेकडून येणारे वारे आणि आर्द्रतेतील बदल यामुळे तापमानात ही चढ-उतार पाहायला मिळत आहे.

वाढत्या उष्म्याचा विचार करता, गोवा वेधशाळेने काळजी घेण्याचं आवाहन केलं आहे. विशेषतः दुपारी ११ ते ३ या वेळेत उन्हाची तीव्रता सर्वाधिक असते, त्यामुळे शक्य असल्यास या काळात घराबाहेर पडणे टाळावे. जर बाहेर जाणे अनिवार्य असेल, तर डोक्यावर टोपी किंवा छत्रीचा वापर करावा. निर्जलीकरण टाळण्यासाठी शरीरातील पाण्याची पातळी टिकवून ठेवणे अत्यंत आवश्यक आहे.

बदलत्या हवामानाचा थेट परिणाम मानवी आरोग्यावर, विशेषतः लहान मुले आणि वृद्धांवर होण्याची शक्यता असते. या काळात सुती आणि सैल कपड्यांना प्राधान्य द्यावे. आहारात लिंबूपाणी, ताक, शहाळे पाणी यांसारख्या नैसर्गिक पेयांचा समावेश करावा. या 'डबल ऋतू'मुळे सर्दी-खोकल्याचे प्रमाण वाढू शकते, त्यामुळे नागरिकांनी सतर्क राहणे गरजेचे आहे.