पणजी: उत्तर गोव्यातील भोम-बाणास्तरीजवळ तिसवाडीला पाणीपुरवठा करणारी जलवाहिनी फुटल्यामुळे पणजी, ताळगाव, सांताक्रुझ, सांतआंद्रे, बांबोळी आणि परिसरात गेल्‍या दोन दिवसांपासून पाण्याची तीव्र टंचाई निर्माण झाली होती.

बुधवारी रात्री उशिरापर्यंत ही जलवाहिनी दुरुस्तीचे काम सुरू होते. अखेर गुरुवारी सकाळी पाणीपुरवठा विभागाला जलवाहिनी दुरुस्त करण्यात यश आले. दुपारी पाणी आले पण ते खूपच गढूळ होते. आजपासून सुरळीत पाणीपुरवठा सुरू होईल, असे पाणीपुरवठा विभागाच्या कार्यकारी अभियंत्‍याने सांगितले.

जलवाहिनी दुरुस्त झाल्यानंतर तात्‍काळ पाणी सोडण्यात आले. मात्र ते मर्यादित होतेच शिवाय गढूळ होते. आता या जलवाहिनीचे काम पूर्णत: मार्गी लागल्‍याने उद्यापासून सुरळीत पाणीपुरवठा होणार आहे. दरम्यान, आज पाण्‍याचा दाब खूपच कमी असल्‍याने इमारतीच्‍या वरच्या मजल्यांवर राहणाऱ्या लोकांना पाणीपुरवठा होऊ शकला नाही. त्‍यांची गैरसोयच झाली.