पिसुर्ले : पिसुर्ले होंडा परिसरातील खाण व्यवसाय गेल्या 10 वर्षांपासून पूर्णपणे बंद असल्याने येथील खाणींच्या खंदकात साठलेल्या पाण्याचा उपसा झाला नाही. परिणामी सदर खाण पिटातील पाण्याने धोक्याची पातळी ओलांडली असून पावसाळा सुरु होण्यापूर्वीच काही ठिकाणी पाणी झिरपत असल्याचे दिसून आले आहे. त्यामुळे येणाऱ्या पावसाळ्यात पाण्याची पातळी आणखीन वाढून खालच्या भागात असलेल्या गावांना धोका निर्माण होण्याची शक्यता आहे.

पर्ये मतदार संघात येणाऱ्या होंडा तसेच पिसुर्ले पंचायत क्षेत्रात मोठ्या प्रमाणात खाण व्यवसाय गेल्या कित्येक वर्षांपासून सुरु होता. यामध्ये सेसा गोवा, दामोदर मगंलजी, आर एस शेट्ये, चौगुले, फोमेन्तो अशा नामवंत खाण कंपन्याचा समावेश होता. गेल्या दहा वर्षांपासून विविध कारणांमुळे या भागातील खाण व्यवसाय बंद असल्याने या खाण कंपन्यांच्या पिटामध्ये पाणी साठलं आहे. सध्या या भागातील पिसुर्ले तसेच वाघुरे शिंगणे या ठिकाणी बंद असलेल्या खाणी मध्ये मोठ्या प्रमाणात पाणी साठलेले आहे. त्यातील पिसुर्ले तसेच धाटवाडा गावाजवळ असलेल्या खाण पिटातील पाणी वर येऊन जवळपास असलेल्या शेतात झिरपू लागले आहे.

यापूर्वी खाणी सुरु असताना सदर खाणीतील पाण्याचा दिवस रात्र यंत्राद्वारे उपसा होत होता. त्यामुळे पाण्याची पातळी समतोल राहण्यासाठी मदत होत होती. त्याचप्रमाणे हे पाणी जवळपास असलेल्या नाल्यात सोडले जात असल्याने परिसरातील शेती बागायतीना याचा फायदा होत होता. परंतु सध्या खाण व्यवसाय बंद असल्याने खाणीतील पाण्याचा उपसा झाला नाही. त्यामुळे पाण्याने धोक्याची पातळी ओलांडली असून सरकारने तातडीने योग्य ती पावले उचलण्याची मागणी होत आहे. या खाणीतील पाणी मोठ्या प्रमाणात बाहेर झिरपत असल्याने तेथे दलदल निर्माण झाली आहे.

या खाणीतील पाण्याचा उपसा करण्यासाठी गेल्या पाच वर्षांपासून संबंधित खाण कंपन्या तसेच सरकारला कळवण्यात आले आहे. सदर पाण्याची पातळी मोठ्या प्रमाणात वाढली असल्याने पावसाळ्यात आजूबाजूच्या परिसरातील नागरिकांना धोका आहे. त्यामुळे तातडीने याप्रकरणी सरकारने लक्ष घालण्याची गरज स्थानिकांमधून व्यक्त होत आहे.