पणजी: गोव्यातील एकमेव प्राणी संग्रहालय असलेल्या बोंडला अभयारण्यातील प्राणीसंग्रहालयातील काही प्राण्यांचा अलीकडेच संसर्गजन्य आजारामुळे मृत्यू झाल्याची घटना ताजी असतानाच, गोवा सरकारने प्राणी आरोग्य व्यवस्थापन अधिक सक्षम करण्याच्या दृष्टीने कंत्राटी तत्त्वावर पशुवैद्यकीय अधिकारी नेमण्याचा निर्णय घेतला आहे.

राज्य मंत्रिमंडळाच्या बैठकीत या प्रस्तावाला मंजुरी देण्यात आली. मुख्यमंत्री डॉ. प्रमोद सावंत यांनी बैठकीनंतर झालेल्या पत्रकार परिषदेत याबाबत माहिती दिली.

बोंडला प्राणी संग्रहालय हे गोव्याच्या पर्यावरणीय पर्यटनाचे महत्त्वाचे केंद्र असून, तेथे वाघ, बिबटे, सांबर, हरिण, माकडे, रानडुक्कर, पक्षी व सर्प या विविध प्रजातींचे संरक्षण व संवर्धन केले जाते. मात्र, मागील काही महिन्यांत काही प्राण्यांमध्ये विषाणूजन्य संसर्ग आढळून आला होता. त्यातून काही प्राण्यांचा मृत्यू झाल्याचे अहवालात स्पष्ट झाले होते.

त्यामुळे बोंडला येथील प्राण्यांच्या आरोग्यावर लक्ष ठेवणारी स्वतंत्र वैद्यकीय सेवा उपलब्ध व्हावी, अशी मागणी पर्यावरणप्रेमी, वन विभाग अधिकारी व सामाजिक संस्थांकडून केली जात होती.

मुख्यमंत्री प्रमोद सावंत यांनी स्पष्ट केले की, या नव्या नियुक्तीमुळे प्राणी आरोग्य तपासणी, लसीकरण, आहार नियंत्रण, आणि रोग निदान यासारख्या बाबी अधिक प्रभावीपणे हाताळता येणार आहेत. हा अधिकारी कंत्राटी स्वरूपात तात्पुरत्या स्वरूपात नेमण्यात येणार असला तरी भविष्यात स्थायी नियुक्तीबाबतही विचार केला जाईल, असे संकेत त्यांनी दिले. वनखात्याच्या मते, जंगलातील प्राण्यांना कमी त्रास होईल, वेळेत उपचार मिळतील.

सुव्यवस्थापनासाठी उपाययोजना

गोवा सरकारने बोंडला प्राणी संग्रहालयाच्या सुव्यवस्थापनासाठी आणखी काही उपाययोजना हाती घेण्याचे संकेत दिले आहेत. यात प्राण्यांच्या अधिवासांचे नूतनीकरण, निगा राखण्याचे यंत्र अधिक सक्षम करणे, तसेच वन्यजीव प्रशिक्षकांची भरती करणे यांचा समावेश असू शकतो.

राज्य सरकारचा निर्णय वन्यजीव संवर्धनाच्या दिशेने एक सकारात्मक पाऊल मानला जात असून, गोव्यातील एकमेव प्राणी संग्रहालयाची गुणवत्ता आणि विश्वासार्हता टिकवून ठेवण्यास मदत होणार आहे.