वाळपई: पाटवळ-सत्तरी येथे बेकायदेशीररीत्या जनावरांची शिकार तसेच गोळी लागून समद खान (२२) याच्या मृत्यूप्रकरणी बाबू उमर संघार व गाऊस नूर अहमद पटेल यांच्या पोलिस कोठडीत डिचोली न्यायालयाने चार दिवसांची वाढ केली आहे.

२६ डिसेंबर रोजी संशयितांना यापूर्वी चार दिवसांची पोलिस कोठडी म्हापसा न्यायालयाने सुनावली होती. त्यानुसार सोमवार, ३० डिसेंबर रोजी पुन्हा चार दिवसांच्या कोठडीत वाढ करण्यात आली होती. त्यानंतर शनिवारी (४ डिसेंबर ) परत पोलिस कोठडीत वाढ करण्यात आलेली आहे.

पाटवळ येथे रात्री दोनच्या सुमारास रानटी जनावरांची शिकार करण्यासाठी गेलेल्या तिघांपैकी समद खान (नाणूस) याचा बंदुकीची गोळी घालून मृत्यू झाला होता. त्यानंतर पोलिसांनी दोघा संशयितांवर गुन्हा दाखल करून अटक केली होती.

तसेच कार गाडी व शस्त्रे जप्त केली होती. शवचिकित्सेनंतर समद खान याचा मृतदेह कुटुंबीयांच्या स्वाधीन करण्यात आला आणि त्यानंतर नाणूस येथील निवासस्थानी अंतिम दर्शनासाठी कुटुंबीय, नातेवाईक, मित्रमंडळी व ग्रामस्थांनी मोठी गर्दी केली होती.

वाळपईत पोलिसांचे कोंबिंग ऑपरेशन

वाळपई सत्तरी येथे बेकायदेशीर शिकारीसाठी निघालेल्या समद खान (२२) याचा गोळी लागून मृत्यू झाला. मृत्यूच्या या प्रकरणानंतर पोलिसांच्या मनात शंकेची पाल चुकचुकल्याने त्यांनी परिसरात पाहणीला सुरुवात केली. वाळपई पोलिसांकडून संशयितांच्या घराभोवती तपासणी सुरु झालीच मात्र त्यासोबत पोलिसांनी वाळपई परिसरात केवळ तीन दिवसांमध्ये शंभरपेक्षा जास्ती घरांची झडती घेतली होती.