खुलेआम दारु, सिगरेट सेवनासोबत ड्रग्सतस्करीचा विषय पोलिसांकडून गांभीर्याने घेतला जात नसल्याच्या आरोपावरुन रविवारी झालेली सडये-शिवोली ग्रामपंचायतीची ग्रामसभा गाजली होती. पोलिस कारवाई करीत नसल्याने नागरिकांनी संताप व्यक्त केला होता.

या पार्श्वभूमीवर आज बुधवारी म्हापसा पोलिसांनी स्थानिक सरपंचाची पंचायत कार्यालायत भेट घेतली व त्यानंतर पंचायतीने दाखविलेल्या जागांची पोलिसांकडून संयुक्त पाहणी केली. या पाहणीदरम्यान दोघांना ताब्यात घेतले व त्यांच्यावर कोटपाअंतर्गत कारवाई करण्‍यात आली.

याबाबत म्हापसा पोलिस निरीक्षक परेश नाईक यांनी सांगितले की, सडये-शिवोली पंचायत क्षेत्रातील काही खुल्या जागेत किंवा आडोशाच्या ठिकाणी काही युवक दारु, सिगरेट व अंमलीपदार्थांचे सेवन करतात असा आरोप करण्यात आला.

या विषयावरून ग्रामसभेत वादंग निर्माण झाला होता. त्यामुळे आज सरपंचांची भेट घेऊन त्यांच्याकडून माहिती घेतली. तसेच काही जागांवर साध्या वेशात पोलिस नियुक्त करून गस्त वाढविली जाईल. असे प्रकार बंद करण्‍यासाठी आम्ही कटिबद्ध आहोत.

मध्यंतरी आम्हाला अशा जागांवर दारूच्या बाटल्यांचा खच तसेच रिकाम्या इंजेक्शन सापडल्या होत्‍या. त्‍यामुळे यापूर्वीच पोलिसांना कळविले होते, असे सडये-शिवोलीच्‍या सरपंच दीपा पेडणेकर यांनी सांगितले.

दोघे संशयित ताब्‍यात; कोटपाअंतर्गत कारवाई

सडये-शिवोली सरपंचांसोबत म्हापसा पोलिसांनी फिल्डवर जाऊन संशयास्‍पद जागांची पाहणी केली. त्यानुसार शेळ-गावसावाडा, सडये-मायणा व आजबाजूच्या परिसरात पाहणी केली. यावेळी दोन मुलांना पोलिसांनी ताब्यात घेतले.

तंबाखूजन्य पदार्थविक्री प्रतिबंध कायद्याअंतर्गत (कोटपा) दोघांवर गुन्हा नोंदविण्यात आला आहे. पोलिस निरीक्षक परेश नाईक, उपनिरीक्षक गौरव नाईक, हेड कॉन्स्टेबल उमेश नाईक, कॉन्स्टेबल प्रकाश पोळेकर, राजेश कांदोळकर व इतर कर्मचारी यावेळी उपस्‍थित होते.

खुल्या जागेत तसेच माळरानावर आडोशाला बसून दारू पिणे व इतर गैरप्रकार होत असल्याचे आम्ही वेळोवेळी पोलिसांना लेखी कळविले.

तसेच ग्रामस्थांनी याबाबत ग्रामसभेत आवाज उठविला. त्‍याची दखल घेत आज म्हापसा पोलिसांनी येऊन या जागांची पाहणी केली. पंचायत क्षेत्रातील दहा जागांची ओळख पटविली आहे. पोलिसांना या ठिकाणी गस्त वाढविण्यास सांगितले आहे.

- दीपा पेडणेकर, सडये-शिवोली सरपंच