प्रकाश तळवणेकर

गोव्याला सुंदर आणि लांबलचक समुद्र किनारा लाभला आहे. येथील किनाऱ्यांवर अनेक रंगीबेरंगी, आकर्षक असे शंख शिंपले सापडतात. खाण्यासाठी वापरल्या जाणाऱ्या शिंपल्यांची चव जशी रुचकर असते, तसेच हे शिंपले जर व्यवस्थित मांडले तर याच शंख, शिंपल्यांतून एकाहून एक सरस कलात्मक व सुंदर अशा शोभेच्या वस्तूही तयार होऊ शकतात. याची प्रचीती नम्रता परब यांच्या कलाकृती पाहिल्यास येते.

गेली २८ वर्षे नम्रता परब या हस्तकलेची सेवा करत आहेत. पर्वरी हे त्यांचे माहेर.(त्या पूर्वाश्रमीच्या सविता गावस). शंख-शिंपल्यांपासून कलात्मक वस्तू करण्याची आवड असणाऱ्या सिने अभिनेत्री राधिका मालिक यांच्याकडे मदतनीस म्हणून दहावीपर्यंत शिकलेल्या नम्रता काम करू लागल्या. त्यातूनच नम्रता यांनीही ही कला आत्मसात केली. हस्तकला महामंडळाच्या अधिकाऱ्यांनी नम्रता बनवत असलेल्या वस्तू बघून त्यांच्या कलेचे कौतुक करायचे. त्यातूनच नम्रताला प्रोत्साहन मिळाले.

रामेश्वरमहून येतो कच्चा माल

सुरवातीला नम्रता येथील किनाऱ्यावर जाऊन शंख - शिंपले गोळा करून आणायाच्या.पण आवश्यक संख्येने शंख शिंपले मिळत नसल्याने वेळ व श्रम वाया जायचे. शेवटी त्यांनी तमिळनाडू मधील रामेश्वरम येथून कच्चा माल मागवण्यास सुरवात केली. वस्तूनुसार साजेशे शंख, शिंपले वापरावे लागतात. आधी कलाकृती कागदावर त्या रेखाटतात. त्यानंतर शंख, शिंपल्यांची आकर्षक मांडणी करून ती प्रत्यक्षात अवतरते.