वास्को: सांकवाळ आणि वास्को रेल्वे स्थानकादरम्यान रेल्वे रुळावर एका अनोळखी पुरुषाचा मृतदेह आढळल्यानंतर वास्को रेल्वे पोलिसांनी अनैसर्गिक मृत्यूचा गुन्हा दाखल केला आहे.

याबाबत सर्वप्रथम वास्कोच्या डेप्युटी स्टेशन मॅनेजरने माहिती दिल्यानंतर पोलिसांनी तत्काळ घटनास्थळी भेट देऊन मृतदेह ताब्यात घेतला.

सुमारे ४५ ते ५० वयाच्या पुरुषाचा हा मृतदेह असून मृत व्यक्तीचे शरीर पातळ, गोरा रंग आणि उंची सुमारे ५ फूट ६ इंच आहे. अंगावर निळ्या रंगाचा लांब बाह्यांचा शर्ट आणि काळी फॉर्मल पँट आहे.

प्राथमिक चौकशीत त्या व्यक्तीचा मृत्यू चालताना किंवा रेल्वे ट्रॅक ओलांडण्याचा प्रयत्न करताना झाला असावा, असा कयास आहे. मृतदेह शवचिकित्सेसाठी दक्षिण गोवा जिल्हा रुग्णालयात पाठवला आहे. उपनिरीक्षक कृष्णा तळपी चौकशी करीत आहेत.