Accidental Death: एकतानगर, म्हापसा येथील गृहनिर्माण मंडळाच्या वसाहतीजवळ एका घराचा सेप्टिक टँक उपसण्यासाठी त्यात उतरलेल्या कामगाराचा विषारी वायुमुळे गुदमरून दुर्दैवी मृत्यू झाला. यमनाप्पा मदार (वय २४, रा. लक्ष्मीनगर-म्हापसा, मूळ बेळगाव) असे मृताचे नाव असून गुदमरल्यामुळे त्याचा मृत्यू झाल्याचा प्राथमिक अंदाज वर्तवला जात आहे.

ही दुर्घटना गुरुवारी रात्री १२ वाजून ९ मिनिटांनी घडली. या कामगाराला बाहेर काढण्यासाठी म्हापसा अग्निशमन दलाला पाचारण केले. दलाचे जवान तिथे पोहोचले असता टँकचे तोंड अतिशय लहान असून आत विषारी वायू साठल्याचे त्यांच्या लक्षात आले. त्यामुळे त्यांनी टँकचे तोंड मोठे केले आणि एक जवान सुरक्षेची साधने वापरून आत उतरला.

त्यांनी बेशुद्ध कामगाराला बाहेर काढून त्याला इस्पितळात नेले. मात्र, तेथील डॉक्टरांनी त्याला मृत घोषित केले. त्याचा मृतदेह उत्तरीय तपासणीसाठी पाठवला आहे. म्हापसा पोलिसांनी अपघाती मृत्यू म्हणून या घटनेची नोंद केली आहे.

एकतानगर भागातील गृहनिर्माण मंडळाच्या वसाहतीजवळ एका घराचा सेप्टिक टँक उपसण्याचे काम गुरुवारी रात्री चार कामगारांनी सुरू केले. यावेळी यमनाप्पा हा टँकमध्ये उतरला. या टँकचे तोंड अरुंद आणि खोली सुमारे ४ मीटर खोल आहे.

टँकमध्ये गेल्यावर तो काही वेळातच बेशुद्ध होऊन खाली पडला. त्याला बाहेर काढण्यासाठी दुसरा कामगार आत उतरला. मात्र, श्वास कोंडू लागल्याने तो लगेच वर आला. त्यामुळे तो बचावला.