फातोर्डा: डांबराचा जुना थर न काढताच मडगावात रस्त्यावर हॉटमिक्स केल्याने जुने दुभाजक या थराखाली आले आहेत. वाहनचालकांना त्याचा अंदाज येत नसल्याचे या रस्त्यावर आता अपघात वाढू लागले आहेत.

मडगावच्या रस्त्याचे हॉटमिक्सिंग करण्यात आले आहे; मात्र या रस्त्यावर दिशादर्शकाच्या पट्ट्या रेखण्यात न आल्याने येथे अपघात होण्याचे प्रकार घडत आहेत. त्यामुळे या पट्ट्यांचे रेखन लवकर करावे, अशी मागणी जोर धरू लागली आहे.

मडगाव उद्यानाच्या डाव्या बाजूला पादचाऱ्यांना जाण्यासाठी रस्त्यावर असलेले झेब्रा क्रॉसिंग नव्याने केलेल्या हॉटमिक्सिंगमुळे दिसत नाही. त्यामुळे या ठिकाणी रात्रीच्या वेळी अपघात होत आहेत. याबरोबरच कामत हॉटेलजवळ बसथांब्यासाठी असलेले डिव्हायडर हॉटमिक्सिंगमुळे रस्त्याची उंची वाढल्याने वाहनचालकाला स्पष्ट दिसत नाहीत. त्यामुळे अपघातांना आमंत्रण मिळत आहे. तसेच रस्त्याची उंची वाढवण्यात आली असल्याने फुटपाथ आणि रस्ता समांतर पातळीवर आले आहेत. त्यामुळे एखादे वाहन कुठल्याही वेळी ओव्हरस्पिडने असल्यास या फुटपाथवर चढण्याची शक्यता आहे.

मडगावचे नगरसेवक महेश आमोणकर या बाजूने रात्रीच्या वेळी जात होते. दरम्यान येथे एकाला डिव्हायडर न समजल्यामुळे अपघात होऊन गंभीर दुखापत झाली होती, असे त्यांनी सांगितले.