Goa Crime News : राज्यात मागील पाच वर्षांत 343 लैंगिक अत्याचारांच्या गुन्ह्यांची नोंद झाले आहेत. यातील 238 गुन्हे 18 वर्षांखालील मुलींवर झाले आहेत. राज्यात 61 प्रकरणे 2018 मध्ये, 73 प्रकरणे 2019 मध्ये, 62 प्रकरणे 2020 मध्ये, 72 प्रकरणे 2021 मध्ये तर 2022 मध्ये 75 लैंगिक अत्याचारांच्या गुन्ह्यांची नोंद झाली आहेत.

यातील 12 प्रकरणे पोलिसांकडे प्रलंबित आहेत. तर 26 प्रकरणांत पोलिसांनी न्यायालयात अंतिम अहवाल सादर केला आहे. या शिवाय 308 प्रकरणांत पोलिसांनी न्यायालयात आरोपपत्र सादर केले आहे

दरम्यान, लग्नाचे आमिष दाखवून युवतीवर लैंगिक अत्याचार केल्याच्या 2 वेगवेगळ्या घटना राज्यात उघडकीस आल्या आहेत. या घटनांमुळे राज्यात खळबळ उडाली आहे. यातील एक गुन्हा पेडणे पोलिसांत नोंद झाला आहे तर दुसरा सांगे पोलिसांत नोंद झाला आहे. याप्रकरणाचा पुढील तपास पोलिस करीत आहे.

याबाबत अधिक माहिती अशी की, पहिली घटना ही पेडणे तालुक्यातून समोर येत आहे. एका युवतीला संशयिताने लग्नाचे आमिष दाखवून तिच्यावर अत्याचार केला. याबाबत पिडीत युवतीने पेडणे पोलिसांत तक्रार दाखल केली आहे.

या तक्रारीच्या आधारे लैंगिक अत्याचार केल्याच्या आरोपाखाली संशयिताविरुध्द गुन्हा नोंद करण्यात आला आहे. याप्रकरणाचा पुढील तपास पेडणे पोलिस करीत आहेत.

तर दुसरी घटना सांगे तालुक्यातून समोर येत आहे. याप्रकरणातील पिडित युवती ही ठाणे मुंबई येथील असल्याची प्राथमिक माहिती आहे. संशयिताने ठाणे येथील युवतीवर लग्नाचे आमिष दाखवून बलात्कार केला.

याबाबतची तक्रार पिडीत युवतीने सांगे पोलिसांत दाखल केली आहे. या तक्रारीच्या आधारे बलात्कार केल्याच्या आरोपाखाली सांगे पोलिसांत संशयित युवकावर गुन्हा नोंद करण्यात आला आहे.