गोव्यात मागील काही दिवसांपासून कोरोना रूग्णांचा मृत्यू होत आहे. आज (दि.29) आणखी दोन कोरोना रूग्ण दगावले असून, मागील पाच दिवसांत सहा रूग्ण दगावले आहेत. आज दिवसभरात गोव्यात 72 नव्या रूग्णांची नोंद झाली आहे. तर, 98 कोरोनामुक्तांना डिस्चार्ज देण्यात आला आहे. सध्याच्या घडीला गोव्यात 873 सक्रिय कोरोना रूग्णांवर उपचार सुरू आहेत.

आरोग्य विभागाने प्रसिद्ध केलेल्या आकडेवारीनुसार, गोव्यातील एकूण कोरोनाबाधित रूग्णांची संख्या 2 लाख 55 हजार 968 एवढी झाली आहे. त्यापैकी 2 लाख 51 हजार 132 जण यशस्वी उपचारानंतर बरे झाले आहेत. राज्याचा कोरोना रिकव्हरी रेट 98.11 टक्के एवढा झाला आहे. आज दिवसभरात 559 प्रयोगशाळा नमुने तापसले आहेत.

मागील दोन दिवसांपासून गोव्यात नव्यानं वाढ होणाऱ्या कोरोना रूग्णांची संख्या कमी झाली आहे. पण, दररोज रूग्ण दगावत आहेत. सलग पाच दिवसात गोव्यात सहा कोरोना रूग्ण दगावले आहेत. आज दोन तर मागील चार दिवस प्रत्येकी एक रूग्ण दगावला आहे. गणेशोत्सवाच्या तोंडावर गोव्यात रूग्ण दगावत असल्याने नागरिकांनी अधिक सतर्क राहणे गरजेचे आहे.