Preschool Assistants Protest: महिन्याला केवळ 10 हजार रुपये वेतन; पूर्व प्राथमिक मदतनीसांचा सरकारविरोधात एल्गार, कारकुनांप्रमाणे सुविधा देण्याची मागणी

पणजी: राज्यातील पूर्व प्राथमिक शाळांमध्ये कार्यरत असलेल्या मदतनीसांना केवळ १० हजार रुपये वेतन देण्यात येते. इतर कोणत्याच सुविधा दिल्या जात नाहीत.

या मदतनीस लहान मुलांच्या संगोपनाचे जबाबदारीने काम करतात त्यामुळे त्यांना सरकार कारकुनांना ज्या सुविधा देतात त्या सर्व देण्यात याव्यात, अशी मागणी गोवा ट्रेड अँड कमर्शियल वर्कर्स युनियनचे अध्यक्ष ख्रिस्तोफर फोन्सेका यांनी केली. ते शिक्षण संचालनालयाबाहेर पूर्व प्राथमिक मदनीस संघटनेने काढलेल्या धरणे आंदोलनात बोलत होते. यावेळी संघटनेच्या अध्यक्ष निर्मला नाईक, सचिव कांचन सातर्डेकर व इतर मदतनीस उपस्थित होत्या.

दरम्यान, पूर्व प्राथमिक मदतनीसांच्या वेतनात वाढ करावी, रविवारच्या सुट्टीचे वेतन कापू नये आणि त्यांना पूर्ण ३० दिवसांचे वेतन द्यावे, अशी मागणी करण्यात आली आहे. तसेच, पूर्व प्राथमिक मदतनीसांचे सेवानिवृत्तीचे वय ६५ वर्षे करावे आणि त्यांच्या वेतनात दरवर्षी किमान तीन टक्के वाढ करावी, अशीही त्यांची मागणी आहे.