Dabolim Airport: गोव्यातील दाबोळी विमानतळावरील दोन कर्मचाऱ्यांवर एका 62 वर्षीय ब्रिटीश महिलेने व्हीलचेअर सेवा देण्यासाठी पैसे उकळल्याचा आरोप केला आहे. संबंधित महिलेने या प्रकरणी भारतीय विमानतळ प्राधिकरण (AAI) आणि गोवा पोलिसांकडे तक्रार केली आहे.

गोवा पोलीस विभागातील सूत्रांच्या माहितीनुसार तक्रारदार कॅथरीन फ्रान्सिस वोल्फ यांना चालण्यास त्रास होत आहे. त्या 29 जानेवारी रोजी लंडनच्या गॅटविक विमानतळावरून TUI एअरवेजच्या TOM 031 या फ्लाइटने त्या गोव्यात आल्या. दाबोळी विमानतळावर उतरल्यावर विमानतळ व्यवस्थापकाने या महिलेला व्हीलचेअरवर बसवून तिचे सामान घेऊन जाण्यासाठी दोन कर्मचारी पाठवले.

कॅथरीन यांना चालण्याचा त्रास होत असल्याने त्यांना व्हीलचेअर देण्यात आली होती. पण त्यांच्यासोबतच्या दोन कर्मचाऱ्यांनी कॅथरीन यांच्या असहाय्यतेचा गैरफायदा घेतला. या दोघा कर्मचाऱ्यांनी कॅथरीन यांना विमानतळावर एका ठिकाणी थांबवले आणि आम्हाला पैसे दिले नाही तर आम्ही तुला येथेच सोडू, पुढे घेऊन जाणार नाही, असे सांगितले.

कॅथरीन यांनी त्यांना वारंवार विनंती करूनही ते कर्मचारी ऐकण्यास तयार नव्हते. अखेर सोबतचे सामान आणि स्वतः व्हीलचेअरवर असल्याने कॅथरीन यांनी दोघांना 4 हजार रूपये दिले. त्यानंतर दोघेही कर्मचारी त्यांना सोडण्यास तयार झाले.

ईमेलद्वारे तक्रार

या प्रकारामुळे कॅथरीन यांना विनाकारण मनस्ताप सहन करावा लागला. त्यांनी नंतर एअरपोर्ट ऑथोरिटी ऑफ इंडिया आणि गोवा पोलिसांकडे ईमेलद्वारे तक्रार करून घडलेल्या प्रकाराची माहिती दिली. सध्या या प्रकरणाची चौकशी केली जात आहे.

अद्याप गुन्हा दाखल नाही

या संदर्भात गोवा आंतरराष्ट्रीय विमानतळाचे संचालक एसव्हीटी धनंजय राव यांनी तक्रारीची चौकशी सुरू असल्याचे सांगितले आहे. तपास पूर्ण झाल्यानंतर योग्य ती कारवाई केली जाईल, असे ते म्हणाले. याप्रकरणी अद्याप कोणताही गुन्हा दाखल करण्यात आला नसल्याचे दाबोळी पोलिसांनी सांगितले.