Mapusa Crime: बस्तोडा येथे घरात आढळून आला महिलेचा कुजलेला मृतदेह

Mapusa Crime News: गोवा विस्तावाडो, बस्तोडा येथे एका वृद्धेचा कुजलेल्या अवस्थेत मृतदेह सापडला. सुकांती उर्फ श्रीमती शशिकांत कुडणेकर (75) असे मयतीचे नाव आहे. ही घटना रविवारी (ता. 5) सायंकाळी उशिरा उडघकीस आली.

मृत वृद्धा ही घरी एकटीच राहत होती, तर तिच्या घराशेजारी तिची विवाहित मुलगी आणि जावई राहत होते. मात्र शेजाऱ्यांनी दिलेल्या माहितीनुसार तिचे मुलीसोबत चांगले संबंध नव्हते. दरम्यान, सुकांती कुडणेकर यांना आरोग्याच्या विविध समस्या होत्या.

गेले काही दिवस त्यांचा कुणाशीही संपर्क झालेला नव्हता. रविवारी सायंकाळी या वृद्धेच्या घरातून दुर्गंधी येत असल्याने शेजाऱ्यांनी पोलिसांना पाचारण केले. त्यानंतर म्हापसा पोलिसांनी घटनास्थळी येऊन घराचा दरवाजा उघडला असता सुकांती यांचा मृतदेह संपूर्ण कुजलेल्या स्थितीत आढळून आला.

महिला पोलीस उपनिरीक्षक रिचा भोंसुले व हवालदार सुशांत चोपडेकर यांनी घटनास्थळी येऊन पंचनामा केला व मृतदेह शवविच्छेदनसाठी गोमेकॉत पाठविला.