पेडणे तालुक्यात तीन महत्वाच्या आणि मोठ्या प्रकल्पांचे उद्धाटन देशाचे प्रधानमंत्री नरेंद्र मोदी यांच्या हस्ते करण्यात आले होते. यात मोपा आंतरराष्ट्रीय विमानतळ, तुये हॉस्पिटल आणि तुये इलेक्ट्रॉनिक सिटी असे हे तीन प्रकल्प होते. दरम्यान, गेल्या वर्षी डिसेंबरमध्ये मोदींच्या हस्ते मोपा विमानतळाचे उद्घाटन करण्यात आले.

पण, या तालुक्यात असलेला महत्वाचा तुये इलेक्ट्रॉनिक सिटी हा प्रकल्प मागील सहा वर्षांपासून ओसाड पडला आहे.

बहुउद्देशीय तुये इलेक्ट्रॉनिक सिटी प्रकल्पात गेल्या सहा वर्षांत एकही कंपनी उभी राहू शकलेली नाही. तसेच, सिटीत केवळ रस्ते आणि विद्युत खांब उभारण्यात आले आहेत. याशिवाय याठिकाणी आलेले दुकानदार देखील गायब झाले आहेत.

राज्याचे माजी मुख्यमंत्री प्रा. लक्ष्मीकांत पार्सेकर यांनी यावरून नाराजी व्यक्त केली आहे. सध्याचे मुख्यमंत्री या प्रश्नाबाबत वेळ देत नसून, काम केव्हा सुरू होणार याबाबत देखील माहिती देत नसल्याचे पार्सेकर म्हणाले. मागील सहा वर्षांपासून प्रकल्पात प्रगती होत नसल्याने अतिव दु:ख होत असल्याचे ते म्हणाले.

'इलेक्‍ट्रॉनिक सिटीला जाणाऱ्या लिंक रोडचे काम अद्याप झालेले नाही. तसेच 10 एमएलडी पाणी प्रकल्प आणि 220 केव्हीए वीज उपकेंद्रही अजून उभारण्यात आलेले नाही. ज्या कंपन्या, दुकाने येथे उभारले जाणार होते, ते सर्व निघून गेले आहेत. आता येथे गुंठा मंत्री येतील.' असे पार्सेकर म्हणाले.

सहा वर्षापूर्वी पंतप्रधान नरेंद्र मोदी यांनी पणजी येथून व्हर्च्युअल पद्धतीने या प्रकल्पाचे भूमिपूजन केले होते. तरीही गेल्या सहा वर्षांत या प्रकल्पात एकही कंपनी उभी राहू शकली नाही. त्यामुळे स्थानिक नागरिक नाराजी व्यक्त करत आहेत.