मडगाव: जागतिक पर्यटन नकाशावर आपले वेगळे स्थान निर्माण करणाऱ्या गोव्यात यंदाच्या पर्यटन हंगामाची सुरुवात अत्यंत उत्साहात झाली आहे. गोव्यातील मनोहर आंतरराष्ट्रीय विमानतळ, मोपा येथे रशियातील नोवोसिबिर्स्क शहरातून पर्यटकांना घेऊन पहिले चार्टर विमान गुरुवार (दि. २) दाखल झाले. कोविड-१९ नंतर आंतरराष्ट्रीय पर्यटकांचा गोव्यावरील वाढता विश्वास या घटनेतून स्पष्टपणे दिसून येत आहे.

पर्यटकांचे भव्य स्वागत!

रशियाहून आलेल्या पर्यटकांचे स्वागत गोव्याच्या पारंपरिक संस्कृतीचे दर्शन घडवणाऱ्या वातावरणात करण्यात आले. राज्याच्या पर्यटन संचालनालयाने या स्वागतासाठी विशेष कार्यक्रमाचे आयोजन केले होते. यामध्ये समाई नृत्य, घोडेमोडणी, आणि धनगर नृत्यासारख्या आकर्षक सांस्कृतिक नृत्याविष्कारांचा समावेश होता.

याशिवाय, एका ब्रास बँडने आपले मधुर संगीत सादर करत पर्यटकांचे पुष्पगुच्छ देऊन उत्साहात स्वागत केले. या पारंपरिक आणि ऊबदार आदरातिथ्याने गोव्याच्या पर्यटन हंगामाची सुरुवात खऱ्या अर्थाने दिमाखदार झाली आहे.

पर्यटन खात्याचा वाढता उत्साह

यावेळी पर्यटन संचालक श्री. केदार नाईक यांच्यासह उपसंचालक श्री. जयेश कानकोणकर, सहाय्यक पर्यटन अधिकारी श्रीमती चित्रा वेंगुरलेकर, तसेच ट्रॅव्हल उद्योगातील मान्यवर जसे की कॉन्कॉर्ड एक्सॉटिक व्हॉयेजेसचे वरिष्ठ उपाध्यक्ष श्री. शेख इस्माईल आणि मिनार ग्रुपचे उपाध्यक्ष श्री. शुबर्ट रेनाल्ड कोलाको हे उपस्थित होते.

या महत्त्वाच्या क्षणी उपस्थित असलेले अधिकारी व मान्यवर यांनी गोव्याच्या पर्यटन विकासासाठी शासनाचे असलेले प्रयत्न अधोरेखित केले. गेल्या काही महिन्यांपासून पर्यटन विभागाने परदेशी पर्यटकांची संख्या वाढवण्यासाठी केलेले विशेष प्रयत्न आता फळाला येत असल्याचे स्पष्ट झाले आहे.

यंदा विदेशी पर्यटकांची संख्या वाढणार?

गोवा हे 'सुरक्षित, स्वागतार्ह आणि जागतिक दर्जाचे पर्यटन स्थळ' म्हणून आंतरराष्ट्रीय स्तरावर पुन्हा एकदा ठसा उमटवत आहे. सूत्रांनी दिलेल्या माहितीनुसार, या वर्षी परदेशी पर्यटकांच्या संख्येत लक्षणीय वाढ होण्याची अपेक्षा आहे, ज्यामुळे स्थानिक पर्यटन व्यवसायाला मोठी चालना मिळणार आहे. पर्यटनमंत्री रोहन खंवटे यांच्या नेतृत्वाखाली पर्यटन विभाग या हंगामात येणाऱ्या प्रत्येक पर्यटकाला अविस्मरणीय अनुभव देण्यासाठी सज्ज झाला आहे.